ព័ត៌មានអន្តរជាតិ

អាជ្ញាធរខេត្តកំពង់ចាម ចុះពិនិត្យមើលការស្ថាបនាផ្លូវ និងប្រព័ន្ធលូទឹក ក្នុងសង្កាត់បឹងកុក

កំពង់ចាម ៖ អភិបាលខេត្តកំពង់ចាម លោក អ៊ុន ចាន់ដា នៅថ្ងៃទី ៥ ខែសីហា ឆ្នាំ ២០២១នេះ បានអញ្ជើញដឹកនាំក្រុមការងារ ចុះពិនិត្យមើលការស្ថាបនា ផ្លូវក្រាលបេតុងប្រមាណជាជាង ១៥០០ ម៉ែត្រ និងប្រព័ន្ធលូបង្ហូរទឹក ស្ថិតនៅក្នុង សង្កាត់បឹងកុក ក្រុងកំពង់ចាម ។

បើតាម លោក ឌួល សុន មន្ត្រីបច្ចេកទេស នៃទីចាត់ការផែនការ វិនិយោគ ខេត្តកំពង់ចាម បានឲ្យដឹងថា ផ្លូវក្រាលបេតុងមួយខ្សែ ប្រវែងជាង១៣០០ ម៉ែត្រ ទទឹង ៦ ម៉ែត្រ និងមួយខ្សែទៀត ប្រវែងជាង ២០០ ម៉ែត្រ ទទឹង ៥ ម៉ែត្រ និងស្ថាបនាលូរំដោះទឹក ប្រវែងជាង ១០០០ ម៉ែត្រ និងលូដែលត្រូវជួសជុល ប្រវែងជាង ៤០០ ម៉ែត្រ ។ លោកបញ្ជាក់ថា គម្រោងស្ថាបនាខាងលើនេះ គឺជាគម្រោងស្ថាបនា តទៅក្នុងថវិកាឆ្នាំ ២០២២ របស់រដ្ឋបាលខេត្តកំពង់ចាម ។

មន្ត្រីបច្ចេកទេសដដែល បានរំលឹកផងដែរថា ក្នុងឆ្នាំកន្លងទៅ ពេលរដូវវស្សា អាជ្ញាធរខេត្តកំពង់ចាម ដឹកនាំដោយ លោក អ៊ុន ចាន់ដា អភិបាលខេត្ត តែងតែបានចុះពិនិត្យមើល រាល់ពេលមានជំនន់ទឹកភ្លៀង ក្នុងភូមិមួយចំនួន នៅក្នុងសង្កាត់បឹងកុក ដើម្បីរកវិធីសាស្រ្ត ដោះស្រាយ ។ ហេតុ ដូច្នោះហើយ ទើបមកដល់បច្ចុប្បន្ននេះ អាជ្ញាធរខេត្តកំពង់ចាម បានអភិវឌ្ឍស្ថាបនាផ្លូវក្រាលបេតុងអាមេ និងស្ថាបនាលូរំដោះទឹក ដើម្បីបញ្ចៀសការជន់លិច ដោយជំនន់ទឹកភ្លៀង ដូចឆ្នាំមុនៗទៀត ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top