ព័ត៌មានអន្តរជាតិ

កាតា ស្នើផ្តល់ថ្នាំវ៉ាក់សាំងកូវីដ១៩ ដល់ជនជាតិអាហ្វហ្គានីស្ថាន ដែលត្រូវជម្លៀស

បរទេស៖ ក្រសួងការបរទេសកាតា បាននិយាយនៅថ្ងៃព្រហស្បតិ៍នេះថា ប្រទេសកាតា កំពុងស្នើផ្តល់ថ្នាំវ៉ាក់សាំងកូវីដ១៩ ដល់ជនត្រូវជម្លៀសចេញពីប្រទេសអាហ្វហ្គានីស្ថាន កំពុងតែស្នាក់នៅក្នុងប្រទេសកាតា ដែលកំពុងតែសម្របសម្រួលដល់កិច្ចប្រឹងប្រែងជម្លៀសសកល ចាប់តាំងពីពួកតាលីបង់ដណ្ដើមបានទីក្រុងកាប៊ុលមក។


នៅក្នុងសេចក្តីថ្លែងការណ៍មួយ ក្រសួងការបរទេសបាននិយាយថា ប្រទេសកាតា ដែលមានមូលដ្ឋានយោធាអាមេរិកដ៏ធំបំផុតក្នុងតំបន់នោះ រហូតមកទល់ពេលនេះ បានជួយជម្លៀសមនុស្សជាង៤០.០០០នាក់ មកកាន់ទីក្រុងដូហា ហើយនឹងបន្តធ្វើការសម្របសម្រួលដល់កិច្ចប្រឹងប្រែងអន្តរជាតិ ក្នុងពេលប៉ុន្មានថ្ងៃខាងមុខនេះ។


ក្រសួងការបរទេសកាតា តាមសេចក្តីរាយការណ៍ បានបន្តថា ជនជម្លៀស ដែលភ្លាមៗនេះនៅមិនទាន់បញ្ជូនទៅកាន់ប្រទេសដទៃនោះ នឹងត្រូវផ្តល់ការតេស្ត PCR និងថ្នាំវ៉ាក់សាំងកូវីដ១៩ ប្រសិនបើស្នើសុំ និងបានបន្ថែមថា ទីក្រុងដូហា ជាបណ្ដោះអាសន្ន កំពុងតែទទួលជនជម្លៀសដ៏ច្រើនមួយ ដែលភាគច្រើនពួកគេ គឺជានិស្សិត ក្រុមគ្រួសារ និងអ្នកសារព័ត៌មាន។


គួរបញ្ជាក់ថា ប្រទេសកាតា ក៏បានយល់ព្រមជាមួយសហរដ្ឋអាមេរិក ធ្វើការទទួលជាបណ្ដោះអាសន្ន នូវជនជាតិអាហ្វហ្គានីស្ថាន៨.០០០នាក់ ក្នុងខណៈដែលសហភាពអារ៉ាប់រួមនិងគុយវ៉ែតនិយាយថា ពួកគេនឹងទទួលចំនួន៥.០០០នាក់៕


ប្រែសម្រួល៖ប៉ាង កុង

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top