ព័ត៌មានអន្តរជាតិ

ក្រុមវាយប្រហារ របស់នាវាផ្ទុក យន្តហោះ USS Carl Vinson ធ្វើដំណើរចូលដែនសមុទ្រចិន ខាងត្បូង

បរទេស៖កងទ័ពជើងទឹកសហរដ្ឋអាមេរិក តាមសេចក្តីរាយការណ៍ បានប្រកាសថា ក្រុមវាយប្រហាររបស់នាវាផ្ទុកយន្តហោះ USS Carl Vinson នៅក្នុងសប្ដាហ៍នេះ បានធ្វើដំណើរចូលទៅក្នុងដែនសមុទ្រចិនខាងត្បូង សម្រាប់ជាលើកដំបូង នៅក្នុងអំឡុងប្រតិបត្តិការបច្ចុប្បន្នរបស់ខ្លួន។
នៅក្នុងសេចក្តីប្រកាសព័ត៌មានមួយ កងទ័ពជើងទឹកអាមេរិកបាននិយាយថា ក្នុងខណៈនៅដែនសមុទ្រចិនខាងត្បូង ដែលចិននិងប្រទេសដទៃទៀតក្នុងតំបន់អះអាងកម្មសិទ្ធិនោះ ក្រុមវាយប្រហារនាវាផ្ទុកយន្តហោះអាមេរិកនេះ នឹងធ្វើប្រតិបត្តិការហោះហើរយន្តហោះ សមយុទ្ធវាយប្រហារនៅដែនសមុទ្រ ក៏ដូចជាការហ្វឹកហាត់យុទ្ធសាស្ត្រសម្របសម្រួល រវាងអង្គភាពលើផ្ទៃសមុទ្រនិងដែនអាកាស។

តាមសេចក្តីរាយការណ៍ ក្រុមវាយប្រហាររបស់នាវាផ្ទុកយន្តហោះនេះ គឺត្រូវបានបញ្ជូនទៅកាន់តំបន់របស់កងនាវាលេខ៧អាមេរិក ប្រចាំនៅតំបន់ឥណ្ឌូ-ប៉ាស៊ីហ្វិក ហើយរួមមាននាវាផ្ទុកយន្តហោះ USS Carl Vinson នាវាផ្ទុកយន្តហោះ USS Lake Champlain នាវាពិឃាត USS Chafee និងនាវាចម្បំាង USS Tulsa។

យោងតាមសេចក្តីរាយការណ៍មួយ ដែលចេញផ្សាយដោយទីភ្នាក់ងារសារព័ត៌មាន UPI នៅថ្ងៃទី១០ ខែកញ្ញា ឆ្នាំ២០២១ បានឲ្យដឹងថា ប្រតិបត្តិការនោះ គឺជាផ្នែកនៃអ្វីដែលសហរដ្ឋអាមេរិកនិយាយថា ជាវត្តមានតាមប្រក្រតីរបស់ខ្លួន នៅក្នុងតំបន់ឥណ្ឌូ-ប៉ាស៊ីហ្វិក៕ប្រែសម្រួល៖ប៉ាង កុង


បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top