ព័ត៌មានអន្តរជាតិ

អ៊ីរ៉ង់ សម្លឹងមើលខាងកើត ដើម្បីបញ្ចប់ភាពឯកោ របស់លោកខាងលិច

តេអេរ៉ង់៖ ក្នុងរយៈពេលប៉ុន្មានឆ្នាំ ចុងក្រោយនេះជាពិសេស ចាប់តាំងពីអាមេរិកដកខ្លួន ចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ក្នុងឆ្នាំ២០១៨ អ៊ីរ៉ង់បានរងនូវទណ្ឌកម្ម ដឹកនាំដោយវ៉ាស៊ីនតោន នេះបើយោងតាមការចុះផ្សាយ របស់ទីភ្នាក់ងារសារព័ត៌មាន ចិនស៊ិនហួ។

ការខកចិត្តចំពោះលោកខាងលិច និងការស្វែងរកដំណោះស្រាយនៅផ្ទះ តាមរយៈការធ្វើពិពិធកម្មដៃគូ អន្តរជាតិរបស់ខ្លួនរដ្ឋបាលអ៊ីរ៉ង់ថ្មី ចាប់តាំងពីឡើងកាន់តំណែង កាលពីខែសីហា បានអនុវត្តសកម្មភាពការទូត ដោយផ្តោតសំខាន់លើ “សម្លឹងមើលទៅភាគខាងកើត” ។

នៅខែកញ្ញា អង្គការសហប្រតិបត្តិការសៀងហៃ (SCO) បានចាប់ផ្តើមទទួលស្គាល់អ៊ីរ៉ង់ថា ជាសមាជិកពេញលេញ ពីអ្នកសង្កេតការណ៍។ ទន្ទឹមនឹងនេះដែរអ៊ីរ៉ង់ ក៏បានបង្កើនកិច្ចខិតខំប្រឹងប្រែងទ្វេដង ដើម្បីពង្រឹងទំនាក់ទំនង របស់ខ្លួនជាមួយរុស្ស៊ី ដែលជាឧទាហរណ៍មួយ ដែលជាដំណើរទស្សនកិច្ច របស់រដ្ឋមន្ត្រីការបរទេសអ៊ីរ៉ង់លោក Hossein Amirabdollahian នាពេលថ្មីៗនេះទៅកាន់ទីក្រុងម៉ូស្គូ ក្នុងនាមជាប្រធានគណៈប្រតិភូ។

ថ្លែងប្រាប់ទីភ្នាក់ងារ សារព័ត៌មានផ្លូវការអ៊ីរ៉ង់ IRNA នៅចុងខែកញ្ញាលោក Mahmoud Abbaszadeh Meshkini អ្នកនាំពាក្យគណៈកម្មាធិការ សន្តិសុខជាតិ និងគោលនយោបាយ ការបរទេសនៃសភាអ៊ីរ៉ង់ បានលើកឡើងថា ការចូលជាសមាជិករបស់ SCO នឹងរួមចំណែកដល់ការផ្លាស់ប្តូរ តុល្យភាពអយុត្តិធម៌ដែលគ្របដណ្តប់ ទំនាក់ទំនងនយោបាយអន្តរជាតិ និងជួយបញ្ចប់ឯកតោភាគីនិយម ដឹកនាំដោយអាមេរិក ដែលបាននាំឱ្យទីក្រុងតេអេរ៉ង់ នៅឯកោ។

លោកបានលើកឡើងថា លទ្ធផលសំខាន់បំផុត នៃការចូលជាសមាជិក SCO សម្រាប់ទីក្រុងតេអេរ៉ង់ គឺកាត់បន្ថយផលអវិជ្ជមាន នៃទណ្ឌកម្មអាមេរិក និងនាំមកនូវលទ្ធផល សេដ្ឋកិច្ចវិជ្ជមាន សម្រាប់អ៊ីរ៉ង់។

សកម្មជននយោបាយអ៊ីរ៉ង់ Hossein Kanani Moghaddam បានលើកឡើងថា វាមានសារៈសំខាន់ណាស់ សម្រាប់អ៊ីរ៉ង់ ក្នុងការចូលរួមជាមួយ SCO ក្នុងនាមជាសមាជិកពេញសិទ្ធិ ព្រោះរុស្ស៊ី ចិន ឥណ្ឌា និងប្រទេសសំខាន់ៗដទៃទៀត ក៏ជាសមាជិកនៃអង្គការនេះដែរ។

សមាជិកសភាអ៊ីរ៉ង់លោក Ali Akbar Ahmadpour-Fadaki បានប្រាប់ IRNA ថាវិធីល្អបំផុត ដើម្បីជួបប្រទះការដាក់ទណ្ឌកម្ម របស់សហរដ្ឋអាមេរិក គឺតាមរយៈការបង្កើន កិច្ចសហប្រតិបត្តិការ ជាមួយបូព៌ាដោយបន្ថែមថា សមាជិកភាពរបស់ SCO គឺជាជំហានមួយក្នុងទិសដៅត្រឹមត្រូវ ៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×