ព័ត៌មានអន្តរជាតិ

ប្រធានាធិបតីឈីលី ប្រកាសដាក់រដ្ឋ ស្ថិតក្នុងគ្រាអាសន្ន ដោយសារផ្ទុះអំពើហិង្សា នៅភាគខាងត្បូងប្រទេស

សាន់ទីយ៉ាហ្គោ៖ ទីភ្នាក់ងារព័ត៌មានចិនស៊ិនហួ បានចុះផ្សាយកាលពីរាត្រី ថ្ងៃទី១៣ ខែតុលា ឆ្នាំ២០២១ថា លោក Sebastian Pinera ប្រធានាធិបតីឈីលី កាលពីថ្ងៃអង្គារថា បានប្រកាសដាក់ប្រទេស ក្នុងគ្រាអាសន្ន នៅខេត្ត Biobio, Arauco, Malleco and Cautin និង Cautin ចំពេលមានការកើនឡើង នៃអំពើហិង្សា នៅក្នុងជម្លោះ ដែលពាក់ព័ន្ធនឹងជន Mapuche ជាតិដើម ។

ប្រធានាធិបតីបានថ្លឺងពីវិមាន រដ្ឋាភិបាល នៅទីក្រុងសាន់ទីយ៉ាហ្គោថា “ស្ថានការណ៍ ធ្ងន់ធ្ងរទាមទារ ឱ្យរដ្ឋប្រើប្រាស់មធ្យោបាយ ស្ថាប័ន និងយន្តការ រដ្ឋធម្មនុញ្ញ និងច្បាប់ ដើម្បីការពារប្រជាជន ការពារសណ្តាប់ធ្នាប់ សាធារណៈ និងនីតិរដ្ឋ និងធានានូវសិទ្ធិដែលទទួលស្គាល់ដោយរដ្ឋធម្មនុញ្ញ” ។

ស្ថានភាពគ្រាអាសន្ន នឹងមានរយៈពេល១៥ថ្ងៃ ហើយអាចត្រូវបានពន្យារពេល១៥ថ្ងៃទៀត ស្របតាមរដ្ឋធម្មនុញ្ញឈីលី ។

ជម្លោះដែលអូសបន្លាយ អស់រយៈពេលជាច្រើន ទសវត្សមកហើយរវាងសហគមន៍ ជនជាតិដើមភាគតិច Mapuche ដែលទាមទារដីដូនតារបស់ពួកគេ និងក្រុមហ៊ុន កសិកម្ម ឬ ព្រៃឈើ ដែលមានកម្មសិទ្ធិដីធ្លី បាននាំឱ្យមានការផ្ទុះអំពើហិង្សា ក្នុងរយៈពេលប៉ុន្មានឆ្នាំចុងក្រោយនេះ ដោយមានសមាជិក សហគមន៍ ប៉ូលិស និងកសិករជាច្រើននាក់ ត្រូវបានសម្លាប់ ។

ក្រុម Mapuche កំពុងទាមទារឱ្យមានការស្ដារឡើងវិញ នូវដីដូនតារបស់ពួកគេនៅក្នុងតំបន់ Biobio និង Arauco នៅភាគខាងត្បូង ប្រទេសឈីលី ៕
ប្រែសម្រួលដោយ៖ ម៉ៅ បុប្ផាមករា

To Top
×