បរទេស៖យោធាមីយ៉ានម៉ា តាមសេចក្តីរាយការណ៍ បាននិយាយថា របាយការណ៍ស្តីពីមីយ៉ានម៉ា ចេញដោយប្រេសិតអង្គការសហប្រជាជាតិពីររូប បានប្រើប្រាស់ប្រភពមិនគួរទុកចិត្ត ធ្វើការចោទប្រកាន់ និងរំលោភលើអធិបតេយ្យភាពរបស់ប្រទេសមីយ៉ានម៉ា។
ក្រសួងការបរទេសរបស់បបយោធាមីយ៉ានម៉ា បាននិយាយថា របាយការណ៍និងការនិយាយថ្មីៗនេះ ចេញដោយប្រេសិតពិសេស លោក Christine Schraner Burgener និងអ្នករាយការណ៍ពិសេស លោក Tom Andrews នៅឆ្ងាយពីការពិត និងឆ្លុះបញ្ចំាងភាពអគតិអង្គការសហប្រជាជាតិ។
តាមសេចក្តីរាយការណ៍ ក្រសួងដដែលនេះបាននិយាយក្នុងដំណើរបដិសេធដ៏វែង កាលពីល្ងាចថ្ងៃអាទិត្យដូច្នេះថា “ប្រទេសមីយ៉ានម៉ា មិនអាចទទួលការជំរុញរបស់អង្គការសម្រាប់គោលដៅខ្លួនលើប្រទេស និងប្រើប្រាស់សិទ្ធិមនុស្សជាឧបករណ៍នយោបាយ ដើម្បីធ្វើកាជ្រៀតជ្រែកកិច្ចការផ្ទៃក្នុងនោះទេ”។
គួរបញ្ជាក់ថា របបយោធាមីយ៉ានម៉ា បានបង្កើនការនិយាយការពារខ្លួនខ្លាំងឡើង ស្របពេលដែលមានសម្ពានអន្តរជាតិកើនឡើង រួមមានទាំងសម្ពាធពីសមាគមប្រជាជាតិអាស៊ីអាគ្នេយ៍ផងដែរ ដែលបានចោទជាយូរមកហើយ ពីភាពទន់ខ្សោយលើរដ្ឋាភិបាលយោធាមីយ៉ានម៉ា៕ប្រែសម្រួល៖ប៉ាង កុង
