បរទេស ៖ សមាជិកព្រឹទ្ធសភា មកពីគណបក្ស សាធារណរដ្ឋមួយក្រុម បានណែនាំនូវសេចក្តីព្រាងច្បាប់មួយ ដែលនឹងផ្តល់ជំនួយ យោធាចំនួន ២ពាន់លានដុល្លារ ក្នុងមួយឆ្នាំ ដល់កោះតៃវ៉ាន់ ដើម្បីធានាបានថា កោះស្វយ័តមួយនេះអាចឈរជើងបាន ចំពោះសាធារណរដ្ឋប្រជាមានិតចិន ដែលបានចាត់ទុកវាជាខេត្តរបស់ចិន ក្នុងការបះបោរ ។ សេចក្តីព្រាងច្បាប់នេះ នឹងបំពានលើកិច្ចព្រមព្រៀង សំខាន់មួយក្នុងទំនាក់ទំនង រវាងអាមេរិកនិងចិន ផងដែរ ។
យោងតាមសារព័ត៌មាន Sputnik ចេញផ្សាយនៅថ្ងៃទី៥ ខែវិច្ឆិកា ឆ្នាំ២០២១ បានឱ្យដឹងថា ច្បាប់ស្តីពីការរារាំង កោះតៃវ៉ាន់ ត្រូវបានណែនាំនៅ ក្នុងព្រឹទ្ធសភា កាលពីថ្ងៃព្រហស្បតិ៍ដោយព្រឹទ្ធសមាជិក Jim Risch (R-ID) ដែលជាអ្នកសាធារណរដ្ឋលំដាប់ខ្ពស់បំផុត នៅក្នុងគណៈកម្មាធិការទំនាក់ទំនង បរទេសព្រឹទ្ធសភា និងឧបត្ថម្ភដោយលោក Mike Crapo (R-ID), Bill Hagerty (R-TN), Mitt Romney (R-UT), John Cornyn (R-TX) និងលោក Marco Rubio (R-FL)។
លោក Crapo បាននិយាយនៅ ក្នុងសេចក្តីប្រកាសព័ត៌មានមួយ ថា «ការបង្កើនកិច្ចខិតខំប្រឹងប្រែង របស់ចិនក្នុងការគ្របដណ្តប់លើ ផ្នែកយោធារបស់កោះតៃវ៉ាន់ គឺជាការគំរាមកំហែងដល់ការ ទូតអន្តរជាតិ និងសន្តិសុខក្នុងតំបន់ ។ វាចាំបាច់ណាស់ក្នុងការទទួលបានសមត្ថភាពមិនស៊ីមេទ្រី ការបណ្តុះបណ្តាល និងការត្រៀម ធនធានសម្រាប់កោះតៃវ៉ាន់ ឱ្យបានឆាប់រហ័ស ដូច្នេះកោះនេះអាចការពារខ្លួន ពីការឈ្លានពានរបស់ចិននៅក្នុង តំបន់ឥណ្ឌូប៉ាស៊ីហ្វិក»។
សេចក្តីព្រាងច្បាប់នេះ នឹងតម្រូវឱ្យក្រសួងការបរទេស សហរដ្ឋអាមេរិករៀបចំកម្មវិធីជំនួយ ហិរញ្ញប្បទានយោធា បរទេស ចំនួន 2 ពាន់លានដុល្លារ ជារៀងរាល់ឆ្នាំចាប់ពីឆ្នាំ 2023 ដល់ឆ្នាំ 2032 ដែលផ្តល់ឱ្យទីក្រុងតៃប៉ិ ប្តេជ្ញាចិត្ត ចំពោះការចំណាយ ដែលត្រូវគ្នានឹងប្រាក់ដុល្លារជាដុល្លារ៕
ប្រែសម្រួលៈ ណៃ តុលា
