ព័ត៌មានអន្តរជាតិ

អូមីក្រុង បង្កហានិភ័យ​ នៃ​ការធ្លាក់ចុះសេដ្ឋកិ​ច្ច​ របស់អាមេរិក

វ៉ាស៊ីនតោន ៖ ប្រធានធនាគារកណ្តាល លោក Jerome Powell បានឲ្យដឹងនៅក្នុងសក្ខីកម្ម ជាលាយលក្ខណ៍អក្សរឲ្យដឹងថា ការកើនឡើង នៃករណីឆ្លងជំងឺកូវីដ-១៩ នាពេលថ្មីៗនេះ និងការលេចឡើង នៃទម្រង់ឆ្លងថ្មី អូមីក្រុង Omicron បង្កឱ្យមានហានិភ័យធ្លាក់ចុះដល់ការងារ និងសកម្មភាពសេដ្ឋកិច្ចរបស់សហរដ្ឋអាមេរិក និងការកើនឡើងនូវភាព មិនច្បាស់លាស់ សម្រាប់អតិផរណា ។

លោក Powell បានឲ្យដឹងនៅក្នុងសក្ខីកម្ម ដែលបានរៀបចំសម្រាប់សវនាការមួយ មុនពេលគណៈកម្មាធិការ ធនាគារព្រឹទ្ធសភា ដែលបានកំណត់ នៅព្រឹកថ្ងៃអង្គារនេះថា “ការព្រួយបារម្ភកាន់តែខ្លាំងអំពីមេរោគ អាចកាត់បន្ថយឆន្ទៈ របស់មនុស្សក្នុងការធ្វើការដោយផ្ទាល់ ដែលនឹងធ្វើឱ្យដំណើរការ យឺតនៅក្នុងទីផ្សារការងារ និងធ្វើឱ្យមានការរំខាន ដល់ខ្សែសង្វាក់ផ្គត់ផ្គង់កាន់តែខ្លាំង” ។

លោក Powell បានកត់ សម្គាល់ថា អតុល្យភាព នៃការផ្គត់ផ្គង់ និងតម្រូវការ ដែលទាក់ទងនឹងជំងឺរាតត្បាត បានរួមចំណែកដល់ការ កើនឡើងតម្លៃគួរឱ្យកត់សម្គាល់ នៅក្នុងតំបន់មួយចំនួន ដោយសន្ទស្សន៍តម្លៃសម្រាប់ការ ចំណាយលើការប្រើប្រាស់ ផ្ទាល់ខ្លួនកើនឡើង ៥ភាគរយក្នុងរយៈពេល ១២ខែដែលបញ្ចប់នៅក្នុងខែតុលា ។

លោកបានបញ្ជាក់ថា “វាពិបាកក្នុងការទស្សន៍ ទាយពីភាព ស្ថិតស្ថេរ និងផលប៉ះពាល់ នៃឧបសគ្គផ្គត់ផ្គង់ ប៉ុន្តែឥឡូវនេះវាហាក់ ដូចជាកត្តាដែលជំរុញ ឱ្យអតិផរណា កើនឡើងនឹងបន្តដំណើរការល្អនៅឆ្នាំក្រោយក្នុង ល្បឿន លឿន ” ។

លោក Powell ក៏បានឲ្យដឹងផងដែរថា ធនាគារកណ្តាលយល់ថា អតិផរណាខ្ពស់ ដាក់បន្ទុកយ៉ាងសំខាន់ ជាពិសេសលើអ្នក ដែលមានលទ្ធភាពតិច ក្នុងការបំពេញតម្រូវការសំខាន់ៗ ដូចជាអាហារ ផ្ទះសម្បែង និងការដឹកជញ្ជូន ។

លោកបានបន្ថែមថា “យើងប្តេជ្ញាចិត្ត ចំពោះគោលដៅស្ថិរភាពតម្លៃ របស់យើង ។ យើងនឹងប្រើប្រាស់ឧបករណ៍ របស់យើងទាំងពីរ ដើម្បីគាំទ្រសេដ្ឋកិច្ច និងទីផ្សារការងារដ៏រឹងមាំ និងដើម្បីការពារអតិផរណា ដែលកើនឡើងកុំឱ្យជាប់គាំង” ៕
ដោយ ឈូក បូរ៉ា

To Top