ភ្នំពេញ ៖ លោក Nguyen Minh Vu អនុរដ្ឋមន្ត្រីការបរទេសវៀតណាម បានស្នេីកម្ពុជា រៀបចំបើកច្រកទ្វារព្រំដែនមួយចំនួនឡើងវិញ ព្រមទាំង ពិភាក្សាគ្នារវាងប្រទេសទាំងពីរ ដើម្បីតំឡេីងច្រកទ្វារព្រំដែនថ្មីបន្ថែមទៀត។
ក្នុងជំនួបពិភាក្សាគ្នាជាមួយលោក សុខ ផល រដ្ឋលេខាធិការ ក្រសួងមហាផ្ទៃ នាថ្ងៃទី២០ ខែធ្នូ ឆ្នាំ២០២១លោក Nguyen Minh Vu បានអបអរសាទរដល់កម្ពុជាយកឈ្នះលើជំងឺកូវីដ-១៩ យ៉ាងធំធេង ខណៈវៀតណាម កំពុងតែមានការប្រឈមកាន់តែខ្លាំងឡើងដដែល។
លោក បានបញ្ជាក់ថា «មានគោលបំណង ស្នើដល់ភាគីកម្ពុជា ជួយពិនិត្យលទ្ធភាពរៀបចំបើកនូវច្រកទ្វារព្រំដែនមួយចំនួនឡើងវិញ ដែលមានច្រកទ្វារព្រំដែនមួយចំនួនមិនទាន់បានបើកដំណើរការនៅឡើយ ហើយក៏ដូចជាស្នើឱ្យមានការពិនិត្យ និងពិភាក្សាគ្នារវាងប្រទេសទាំងពីរ ដើម្បីរៀបចំឱ្យមានការតម្លើងនូវច្រកទ្វារព្រំដែនថ្មីបន្ថែមទៀត ព្រមទាំងស្នើឱ្យកម្ពុជាសហការរួមគ្នារៀបចំកិច្ចការងារពាក់ព័ន្ធមួយចំនួននៅតាមខ្សែបន្ទាប់ព្រំដែននៃប្រទេសទាំងពីរ ធ្វើយ៉ាងណាឱ្យព្រំដែននៃប្រទេសទាំងពីរមានស្ថេរភាពជានិរន្ត៍»។
ជាការឆ្លើយតប លោក សុខ ផល ទទួលយកសំណើ របស់ អនុរដ្ឋមន្ត្រីការបរទេសវៀតណាម ហើយពិនិត្យមើល និងប្រជុំពិភាក្សាឱ្យបានគ្រប់ជ្រុងជ្រោយបន្ថែមទៀត ដើម្បីដាក់ជូនរាជរដ្ឋាភិបាលកម្ពុជា ពិនិត្យ និងសម្រេចបន្ត។ លោក និងពិនិត្យមើលឡើងវិញដើម្បីរៀបចំការងារបើកច្រកទ្វារព្រំដែននៃប្រទេសទាំងពីរ ដើម្បីជួយសម្រួលដល់ការរស់នៅ និងទំនាក់ទំនងដោះដូរទំនិញរបស់ប្រទេស ពលរដ្ឋទាំងពីរមានភាពល្អប្រសើរឡើងវិញ។
នាឱកាសនោះដែរ លោករដ្ឋលេខាធិការ ក៏បានបញ្ជាក់ថា ស្ថានភាពនៃប្រទេសកម្ពុជាបច្ចុប្បន្ន រាជរដ្ឋាភិបាល កំពុងតែបើកដំណើរការប្រទេសឡើងវិញស្ទើរទាំងស្រុង បន្ទាបពីកម្ពុជាមានស្ថានភាពធូរស្រាល ដែលបានទប់ស្កាត់ជំងឺរាតត្បាតកូវីដ-១៩ បានជោគជ័យ។
លោក បានបន្តថា បន្ទាប់ពីការបើកប្រទេសឱ្យដំណើរការឡើងវិញ រាជរដ្ឋាភិបាលកម្ពុជា ក៏ដូចជាក្រសួងមហាផ្ទៃ និងពិនិត្យមើលឡើងវិញនូវទំនាក់ទំនង ក៏ដូចជាកិច្ចសហប្រតិបត្តិការនានា ជាមួយប្រទេសវៀតណាម បន្តទៀត ជាពិសេសការងារ បើកច្រកព្រំដែនរវាងប្រទេសទាំងពីរ ឱ្យដំណើរការឡើងវីញផងដែរ៕
