ព័ត៌មានអន្តរជាតិ

ចិន នឹងបន្តចូលរួមចំណែកក្នុងការគ្រប់គ្រង នុយក្លេអ៊ែរពិភពលោក

ប៉េកាំង៖ អនុរដ្ឋមន្ត្រីការបរទេសចិន លោក Ma Zhaoxu បានឲ្យដឹងថា ប្រទេសចិននឹងបន្តរួមចំណែកដ៏ឈ្លាសវៃ និងសំណើរបស់ខ្លួន ចំពោះអភិបាលកិច្ចនុយក្លេអ៊ែរសកល ហើយត្រៀមខ្លួនជាស្រេចក្នុងការអនុវត្តកិច្ចសហប្រតិបត្តិការជាមួយបណ្តាប្រទេសដែលស្រឡាញ់សន្តិភាពទាំងអស់។

លោក Ma បានធ្វើការកត់សម្គាល់នេះក្នុងបទសម្ភាសន៍មួយបន្ទាប់ពីមេដឹកនាំនៃរដ្ឋអាវុធនុយក្លេអ៊ែរទាំង៥ រួមមាន ចិន បារាំង រុស្ស៊ី អង់គ្លេស និងសហរដ្ឋអាមេរិក កាលពីថ្ងៃចន្ទបានចេញសេចក្តីថ្លែងការណ៍រួម ស្តីពីការទប់ស្កាត់សង្គ្រាមនុយក្លេអ៊ែរ និងជៀសវាងការប្រណាំងប្រជែងសព្វាវុធ។

លោក Ma បានប្រាប់ប្រព័ន្ធផ្សព្វផ្សាយអំពីសារៈសំខាន់នៃសេចក្តីថ្លែងការណ៍រួម កិច្ចខិតខំប្រឹងប្រែងរបស់ចិន និងសំណើរបស់ចិន លើការពង្រឹងអភិបាលកិច្ចសកលក្នុងវិស័យនុយក្លេអ៊ែរ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។

លោក Ma បានលើកឡើងថា តាមរយៈការចេញសេចក្តីថ្លែងការណ៍រួម រដ្ឋអាវុធនុយក្លេអ៊ែរទាំង៥ បានសង្កត់ធ្ងន់ថា សង្គ្រាមនុយក្លេអ៊ែរ មិនអាចឈ្នះបានឡើយ ហើយមិនត្រូវវាយបកឡើយ ហើយបានបញ្ជាក់ឡើងវិញថា គ្មានអាវុធនុយក្លេអ៊ែរណាមួយត្រូវបានតម្រង់ទិសគ្នាទៅវិញទៅមក ឬរដ្ឋណាមួយឡើយ។

ផ្ទាំងពាណិជ្ជកម្ម

នេះជាលើកទី១ ហើយសម្រាប់មេដឹកនាំនៃរដ្ឋអាវុធនុយក្លេអ៊ែរទាំង៥ ដែលចេញសេចក្តីថ្លែងការណ៍រួម ដែលបានបង្ហាញអំពីឆន្ទៈនយោបាយរបស់រដ្ឋទាំង៥ ក្នុងការទប់ស្កាត់សង្គ្រាមនុយក្លេអ៊ែរ និងបានផ្តល់សំឡេងរួមរបស់ពួកគេក្នុងការរក្សាស្ថិរភាពជាយុទ្ធសាស្ត្រសកល និងកាត់បន្ថយហានិភ័យក្នុងជម្លោះនុយក្លេអ៊ែរ។

ដោយកត់សម្គាល់ថា ពិភពលោកកំពុងឆ្លងកាត់ការផ្លាស់ប្តូរដែលមិនអាចមើលឃើញក្នុងរយៈពេលមួយសតវត្ស និងផលប៉ះពាល់នៃ ជំងឺកូវីដ-១៩ លោក Ma បានលើកឡើងថា វិស័យសន្តិសុខជាយុទ្ធសាស្ត្រអន្តរជាតិប្រឈមមុខនឹងបញ្ហាធំៗជាច្រើន។

លោក Ma បានបន្ថែមថា សេចក្តីថ្លែងការណ៍រួមនេះគឺអំណោយផលដល់ការបង្កើនទំនុកចិត្តទៅវិញទៅមក ដោយលោកបានបន្ថែមទៀតថា ការជំនួសការប្រកួតប្រជែងក្នុងចំណោមប្រទេសធំៗដោយការសម្របសម្រួល និងកិច្ចសហប្រតិបត្តិការមានសារៈសំខាន់ជាវិជ្ជមានដល់ការកសាងទំនាក់ទំនងប្រទេសធំៗ ដែលមានស្ថិរភាពរួម និងការអភិវឌ្ឍន៍ប្រកបដោយតុល្យភាព៕


ដោយ ឈូក បូរ៉ា

To Top
×