ប្រធានាធិបតីអ៊ុយក្រែន៖ គ្មានប្រទេសអឺរ៉ុបណាមួយ អាចធ្វើឲ្យរុស្ស៊ី មានសំពាធឡើយ

បរទេស៖ នៅក្នុងសេចក្តីថ្លែងការណ៍ជារួមមួយ ជាមួយនឹងប្រធានាធិបតីបារាំង Emmanuel Macron កាលពីថ្ងៃម្សិលមិញ លោកប្រធានាធិបតីអ៊ុយក្រែន Volodymyr Zelensky បានអះអាងថាមកដល់ពេលនេះ គឺមិនមានបណ្តាប្រទេស ក្នុងតំបន់អឺរ៉ុបណាមួយ ដែលអាចដាក់សំពាធ ទៅឲ្យរុស្ស៊ី ក្នុងការផ្លាស់ប្តូរគំនិត និងផែនការរបស់ខ្លួនឡើយ។

ថ្លែងទៅកាន់ក្រុមអ្នកកាសែតជាច្រើននាក់​ នៅក្នុងទីក្រុងកៀវលោក Zelensky បានពន្យល់ថា គាត់មិនមានភាពជឿជាក់ទេថា រដ្ឋាភិបាលទីក្រុងមូស្គូ នឹងមានអារម្មណ៍ថា មានសំពាធណាមួយ ពីសណាក់បណ្តាប្រទេស ក្នុងតំបន់អឺរ៉ុបឡើយ។

គួរឲ្យដឹងដែរថាដំណើរទស្សនកិច្ច របស់លោកប្រធានាធិបតីបារាំង Macron ទៅកាន់ទីក្រុងកៀវបានធ្វើឡើង កាលពីថ្ងៃអង្គារ ដើម្បីអាចពិភាក្សាគ្នា ជាមួយនឹងអ៊ុយក្រែន ខណៈដែលភាពតានតឹងកាន់តែកើនឡើង ដោយសារតែយោធារបស់រុស្ស៊ី នៅតាមបណ្តោយព្រំដែន ហើយមេដឹកនាំទាំងពីរ បានធ្វើកិច្ចប្រជុំដែលមានរយៈពេល រហូតទៅដល់៥ម៉ោង៕ ប្រែសម្រួល៖ស៊ុនលី