បរទេស៖ ធនាគារនៃប្រទេសរុស្ស៊ី កាលពីថ្ងៃព្រហស្បតិ៍បានធ្វើការប្រកាស អំពីផែនការរបស់ខ្លួន ក្នុងការបើកឲ្យដំណើរការ ឲ្យមានលុយឌីជីថល ruble ដែលមានភាពរួចរាល់ជាស្ថាពរ នៅត្រឹមឆ្នាំក្រោយនេះ ព្រមទាំងមានសមត្ថភាព គ្រប់គ្រាន់ក្នុងការទូទាត់លុយ ជាមួយនឹងអន្តរជាតិផងដែរ។
ក្រៅពីនោះរុស្ស៊ី ក៏បានរៀបចំផែនការ ក្នុងការពង្រីកចំនួនបណ្តាប្រទេសផ្សេងជាច្រើនទៀត ដែលនឹងទទួលយកកាតធនាគារ Mir របស់ខ្លួនផងដែរ។
ទេសាភិបាល របស់ធនាគារជាតិលោកស្រី Elvira Nabiulina បានថ្លែងប្រាប់ទៅកាន់សភាថ្នាក់ទាប របស់រុស្ស៊ីថា៖ លុយឌីជីថលស្ថិតនៅក្នុង គម្រោងអទិភាពជាច្រើន។ពួកយើងបានបង្កើតគំរូប្រព័ន្ធនេះរួចទៅហើយ ហើយនឹងចាប់ផ្តើមធ្វើការតេស្តសាកល្បង និងដំណើរការជាមួយនឹងធនាគារទាំងឡាយ នៅត្រឹមឆ្នាំ២០២៣ខាងមុខនេះ។
គួរឲ្យដឹងដែរថា ផែនការនៃការបង្កើតលុយឌីជីថល ដោយខ្លួនឯងនេះត្រូវបានកកើតចេញឡើង តាំងតែពីឆ្នាំ២០២០មកម្ល៉េះ ដោយធនាគារជាតិនៃប្រទេសរុស្សី៕
ប្រែសម្រួល៖ស៊ុនលី
