ព័ត៌មានអន្តរជាតិ

អ៊ីស្រាអែល​ បើកការបាញ់​មីស៊ីល​ វាយប្រហារ​លើ​ទីតាំង​យោធា​ ក្នុង​រដ្ឋធានី​ស៊ីរី

យេរ៉ូសាឡឹម៖ កងទ័ពស៊ីរីបានឲ្យដឹង នៅក្នុងសេចក្តីថ្លែងការណ៍មួយថា កងកម្លាំងអ៊ីស្រាអែលបានបើកការវាយប្រហារដោយ មីស៊ីលចេញពីតំបន់ Golan Heights ដែលកាន់កាប់ដោយអ៊ីស្រាអែល និងបានកំណត់គោលដៅលើទីតាំងយោធាភាគខាងត្បូង នៃរដ្ឋធានីដាម៉ាស់ កាលពីយប់ថ្ងៃចន្ទ។

ប្រភពបានបន្ថែមថា កាំជ្រួចភាគច្រើនគ្រាប់ត្រូវបានស្ទាក់ចាប់បានដោយជោគជ័យ ហើយការវាយប្រហារនេះមិនបណ្តាលឲ្យមានអ្នករងរបួសនោះទេ នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ។

ខាងក្រុមប្រឆាំង ក្រុមសង្កេតការណ៍សិទ្ធិមនុស្សស៊ីរី បានឲ្យដឹងថា ការវាយប្រហាររបស់អ៊ីស្រាអែល បានកំណត់គោលដៅនៅតំបន់ Kisweh ភាគខាងត្បូងនៃទីក្រុងដាម៉ាស់ ជាកន្លែងដែលក្រុមជីវពលស៊ីអ៊ីត គាំទ្រអ៊ីរ៉ង់ស្ថិតនៅទីនោះ។

អ្នកឃ្លាំមើលសង្គ្រាម ដែលមានមូលដ្ឋាននៅចក្រភពអង់គ្លេសបានបន្ថែមថា ការការពារដែនអាកាសស៊ីរី បានស្ទាក់ចាប់ដោយជោគជ័យនូវកាំជ្រួចភាគច្រើន ប៉ុន្តែបានខកខានចំនួនពីរគ្រាប់ ដែលបានវាយប្រហារចំទីតាំងមូលដ្ឋាន៕

ប្រែសម្រួល ឈូក បូរ៉ា

To Top