វ៉ាស៊ីនតោន៖ ប្រធានាធិបតីអាមេរិកលោក ចូ បៃដិន បានចុះហត្ថលេខាលើច្បាប់ ដែលត្រូវបានពិពណ៌នាថា ជាច្បាប់សុវត្ថិភាពកាំភ្លើង ខណៈដែលការបាញ់ប្រហារនៅតែបន្តធ្វើឱ្យប៉ះពាល់ដល់ប្រទេសជាតិ។
ច្បាប់ដែលបានចុះហត្ថលេខា នៅព្រឹកថ្ងៃសៅរ៍ម្សិលមិញនេះ ចូលជាធរមានមួយខែបន្ទាប់ពីខ្មាន់កាំភ្លើងម្នាក់បានវាយលុកចូលសាលាបឋមសិក្សាមួយក្នុងទីក្រុង Uvalde រដ្ឋតិចសាស់ ដោយបានសម្លាប់កុមារចំនួន ១៩នាក់ និងគ្រូបង្រៀន ២ នាក់នៅក្នុងការផ្ទុះមួយ ដែលបានបង្កឱ្យមានបាតុកម្មទូទាំងប្រទេសប្រឆាំងនឹងអំពើហិង្សាដោយកាំភ្លើង និងភាពអសកម្មនយោបាយ។
យោងតាមទិន្នន័យចុងក្រោយបំផុតពីបណ្ណសារអំពើហឹង្សាដោយកាំភ្លើង បានឱ្យដឹងថា មានអ្នកស្លាប់ជាង ២១០០០នាក់ដោយសារអំពើហិង្សាដោយកាំភ្លើង និងការបាញ់ប្រហារទ្រង់ទ្រាយធំចំនួន ២៨១នៅទូទាំងសហរដ្ឋអាមេរិក មកទល់ពេលនេះ។
គួរបញ្ជាក់ថា លោក បៃដិន បាននិយាយពីសេតវិមាន មុនពេលចេញដំណើរទៅអឺរ៉ុបថា “ខ្ញុំដឹងថាមានអ្វីច្រើនទៀតដែលត្រូវធ្វើ”៕ ប្រែសម្រួល ឈូក បូរ៉ា
