វ៉ាស៊ីនតោន ៖ មូលនិធិរូបិយវត្ថុអន្តរជាតិ (IMF) កាលពីថ្ងៃអង្គារបានកាត់បន្ថយការព្យាករណ៍ កំណើនសេដ្ឋកិច្ច របស់សហរដ្ឋអាមេរិក សម្រាប់ឆ្នាំ២០២២ មកត្រឹម ២,៣ ភាគរយ ពោលគឺ តិចជាងមួយខែបន្ទាប់ ពីវាបានកាត់បន្ថយការព្យាករណ៍ មកត្រឹម ២,៩ភាគរយ ។
នៅក្នុងខែមេសា IMF បានព្យាករណ៍ថា GDP របស់សហរដ្ឋអាមេរិក នឹងកើនឡើង ៣,៧ភាគរយនៅឆ្នាំនេះ ។ ក្រុមប្រឹក្សាប្រតិបត្តិរបស់ IMF បានឲ្យដឹងនៅក្នុង សេចក្តីថ្លែងការណ៍មួយថា សហរដ្ឋអាមេរិក “បានជាសះស្បើយយ៉ាងឆាប់រហ័ស” ពីភាពតក់ស្លុត នៃជំងឺរាតត្បាត ដែលជាលទ្ធផល នៃការគាំទ្រគោលនយោបាយរូបិយវត្ថុ និងសារពើពន្ធ ដែលមិនធ្លាប់មាន ។
ពីមុនមក ក្រុមប្រឹក្សាប្រតិបត្តិ របស់ IMF បានឲ្យដឹងនៅក្នុងសេចក្តីថ្លែងការណ៍មួយ បន្ទាប់ពីបញ្ចប់ការពិគ្រោះប្រចាំឆ្នាំនៃមាត្រា IV ដើម្បីពិនិត្យមើលសេដ្ឋកិច្ច សហរដ្ឋអាមេរិក ។
ប៉ុន្តែទោះជាយ៉ាងណា នាយកប្រតិបត្តិ IMF បានកត់សម្គាល់ថា ការស្ទុះងើបឡើងវិញយ៉ាងឆាប់រហ័ស ត្រូវបានអមដោយ “ការកើនឡើង នៃអតិផរណា ដែលមានមូលដ្ឋានទូលំទូលាយ” ដែលជា “ហានិភ័យជាប្រព័ន្ធ” សម្រាប់ទាំងសហរដ្ឋអាមេរិក និង សេដ្ឋកិច្ចពិភពលោក។
សេចក្តីថ្លែងការណ៍បានឲ្យដឹងទៀតថា សម្ពាធប្រាក់ឈ្នួល និងតម្លៃមានមូលដ្ឋានទូលំទូលាយ ហើយបានរីករាលដាលយ៉ាងឆាប់រហ័សនៅទូទាំងសេដ្ឋកិច្ច។ ប្រភពឲ្យដឹងថា “វិធានការរយៈពេលវែង នៃការរំពឹងទុកអតិផរណាបានចាប់ផ្តើម រសាត់កាន់តែខ្ពស់ ហើយវិធានការផ្តេកខ្លី នៃការរំពឹងទុកអតិផរណា បានកើនឡើងយ៉ាងខ្លាំង”។
សេចក្តីថ្លែងការណ៍បានឲ្យដឹងទៀតថា “នៅក្នុងបរិបទនេះ ពួកគេបានសង្កត់ធ្ងន់ថា អាទិភាពគោលនយោបាយ ត្រូវតែមានកំណើនតម្លៃយឺតជាបន្ទាន់ ដោយមិនធ្វើឱ្យមានវិបត្តិសេដ្ឋកិច្ច”។
នាយកប្រតិបត្តិបានយល់ស្របថា ការជៀសវាងវិបត្តិសេដ្ឋកិច្ចនៅសហរដ្ឋអាមេរិកកំពុង “ក្លាយជាបញ្ហាប្រឈម កាន់តែខ្លាំង” ហើយថាជម្លោះរុស្ស៊ី-អ៊ុយក្រែន ជំងឺរាតត្បាតកូវីដ-១៩ ដ៏រ៉ាំរ៉ៃ និងឧបសគ្គផ្នែកផ្គត់ផ្គង់បង្កើត “បញ្ហាប្រឈមបន្ថែម”៕
ប្រែសម្រួល ឈូក បូរ៉ា
