បឺលីន ៖ អធិការបតីអាល្លឺម៉ង់ លោក Olaf Scholz កាលពីថ្ងៃចន្ទបានព្រមានអំពី “ការស្តារឡើងវិញ ជាសកល នៃថាមពលហ្វូស៊ីល និងធ្យូងថ្មជាពិសេស” ដែលជាលទ្ធផលនៃកង្វះឧស្ម័ន ដែលបណ្តាលមក ពីជម្លោះរុស្ស៊ី-អ៊ុយក្រែន ។
ប្រទេសអាល្លឺម៉ង់ និងអេហ្ស៊ីប កំពុងធ្វើជាសហប្រធាន នៃកិច្ចសន្ទនាអាកាសធាតុ Petersberg នៅទីក្រុងប៊ែកឡាំង ដែលមានបំណងកំណត់ទិសដៅ សម្រាប់សន្និសីទ អាកាសធាតុពិភពលោក COP27 នាពេលខាងមុខនៅក្នុងខែវិច្ឆិកា ។ តំណាង ប្រទេសប្រមាណ ៤០កំពុងស្វែង រកកិច្ចព្រមព្រៀង លើដំណើរការបន្ថែមទៀត ក្នុងការប្រយុទ្ធ ប្រឆាំងនឹងវិបត្តិ អាកាសធាតុ ។
លោក Scholz បានឲ្យដឹងនៅឯកិច្ចប្រជុំថា “គ្មាននរណាម្នាក់អាចពេញចិត្ត នឹងការពិតដែលថា ចំណែកនៃការបង្កើត ថាមពលអគ្គីសនី ដោយធ្យូងថ្ម កំពុងកើនឡើងម្តងទៀតនៅក្នុងប្រទេស របស់យើងផងដែរ” ។
នៅក្នុងវីដេអូសុន្ទរកថារបស់លោក អគ្គលេខាធិការអង្គការសហប្រជាជាតិ លោក Antonio Guterres បានជំរុញឱ្យមានកិច្ចសហប្រតិបត្តិការបន្ថែមទៀត។ ដោយលោកបានលើកឡើងថា “អ្វីដែលធ្វើឱ្យខ្ញុំពិបាកបំផុតនោះគឺថា ក្នុងការប្រឈមមុខ នឹងវិបត្តិសកលនេះ យើងកំពុងខកខានក្នុងការ ធ្វើការរួមគ្នាជា សហគមន៍ពហុភាគី”។
លោក Guterres បានលើកឡើងថា “ប្រជាជាតិនានាបន្តលេងល្បែង ស្តីបន្ទោសជាជាងការទទួលខុសត្រូវ សម្រាប់អនាគតរួមរបស់យើង យើងត្រូវតែបង្ហាញនៅ COP27 ថាបដិវត្តន៍កកើតឡើងវិញ កំពុងដំណើរការ” ។
ដើម្បីទប់ស្កាត់ការខ្វះខាត ឧស្ម័នក្នុងរដូវរងានេះ ប្រទេសអាល្លឺម៉ង់ថ្មីៗនេះបានត្រួសត្រាយផ្លូវសម្រាប់រោងចក្រថាមពលដើរដោយធ្យូងថ្មបន្ថែមទៀត ដើម្បីជំនួសរោងចក្រថាមពល ឧស្ម័នសម្រាប់ផលិតអគ្គិសនី ។ លោក Scholz បានបន្ថែមថា “នេះគឺជាវិធានការសង្គ្រោះបន្ទាន់ រយៈពេលខ្លីដែលនឹងមិនត្រូវ បានចំណាយលើគោលដៅ អាកាសធាតុរបស់យើង”៕ប្រែសម្រួល ឈូក បូរ៉ា
