គៀវ៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៦ ខែសីហា ឆ្នាំ២០២២ថា មន្ត្រីដែលបានតែងតាំង ដោយអ៊ុយក្រែន និងរុស្ស៊ី បានរាយការណ៍ពីការបាញ់ផ្លោង នៅជិតរោងចក្រនុយក្លេអ៊ែរ Zaporizhzhia នៅភាគខាងត្បូងអ៊ុយក្រែន កាលពីថ្ងៃចន្ទ ដោយភាគីទាំង២បានស្តីបន្ទោសគ្នា ទៅវិញទៅមក បន្ទាប់ពីទីភ្នាក់ងារថាមពល បរមាណូអន្តរជាតិ បានព្រមានពីគ្រោះមហន្តរាយ ប្រសិនបើការប្រយុទ្ធគ្នា មិនឈប់ឈរទេនោះ ។
រុស្ស៊ី និងអ៊ុយក្រែន បានធ្វើការចោទប្រកាន់គ្នា អំពីការបាញ់ផ្លោងនៅជិតរោងចក្រ ក្នុងរយៈពេលប៉ុន្មានថ្ងៃថ្មីៗនេះ ចំពេលមានការភ័យខ្លាចនៃមហន្តរាយនុយក្លេអ៊ែរ នៅឯបរិវេណដែលគ្របដណ្ដប់ លើច្រាំងភាគខាងត្បូង នៃអាងស្តុកទឹកដ៏ធំ នៅលើទន្លេ Dnipro ។
លោក Volodymyr Zelenskyy ប្រធានាធិបតីអ៊ុយក្រែន បានព្រមានទាហានរុស្ស៊ី ដែលវាយប្រហារស្ថានីយថាមពលនុយក្លេអ៊ែរ ដ៏ធំបំផុតរបស់អឺរ៉ុប ឬប្រើវាជាមូលដ្ឋានដើម្បីបាញ់ ពីនោះពួកគេនឹងក្លាយជា “គោលដៅពិសេស” ។
គួរបញ្ជាក់ថា រោងចក្រនេះស្ថិតនៅក្នុងទីក្រុង Enerhodar ដែលគ្រប់គ្រងដោយរុស្ស៊ី ។
លោក Yevhen Yevtushenko ប្រធានរដ្ឋបាលនៃស្រុក Nikopol ដែលឆ្លងកាត់ទន្លេពី Enerhodar បានស្តីបន្ទោសកងកម្លាំងរុស្ស៊ី ចំពោះការបាញ់ផ្លោងមកលើទីក្រុងនេះ ។
លោក Vladimir Rogov ដែលជាមន្ត្រីលើកបន្តុបដោយរុស្ស៊ី នៅក្នុងទីក្រុងបានលើកឡើងថា ក្នុងរយៈពេល២ម៉ោងកន្លងទៅនេះ កាំភ្លើងធំប្រហែល២៥គ្រាប់ វាយប្រហារដោយម៉ាស៊ីន M777 ដែលផលិតដោយសហរដ្ឋអាមេរិក បានវាយប្រហារ នៅជិតរោងចក្រនុយក្លេអ៊ែរ និងតំបន់លំនៅដ្ឋាន ។
ទីភ្នាក់ងារព័ត៌មាន Interfax របស់រុស្ស៊ី ដែលដកស្រង់ពីសេវាសារព័ត៌មាន របស់រដ្ឋបាលដែលតែងតាំងដោយរុស្ស៊ី នៅEnerhodar បានឲ្យដឹងថា កងកម្លាំងអ៊ុយក្រែន បានបើកការបាញ់ប្រហារ ជាមួយនឹងការផ្ទុះឡើង នៅជិតរោងចក្រថាមពលនេះ ៕ ប្រែសម្រួលដោយ៖ ម៉ៅ បុប្ផាមករា
