តេអេរ៉ង់៖ ក្រសួងការបរទេសអ៊ីរ៉ង់កាលពីថ្ងៃពុធបានថ្កោលទោស ចំពោះចំណាត់ការរបស់រដ្ឋាភិបាលអាល់បានីក្នុងការកាត់ផ្តាច់ទំនាក់ទំនងការទូតជាមួយអ៊ីរ៉ង់ ដោយលើកឡើងថា វាត្រូវបានធ្វើឡើងក្រោមឥទ្ធិពលនៃ “ភាគីទី៣” ។
ក្រសួងបានឲ្យដឹងនៅក្នុងសេចក្តីថ្លែងការណ៍នៅលើគេហទំព័ររបស់ខ្លួនថា ការសម្រេចចិត្តរបស់អាល់បានី ដោយផ្អែកលើ “ការចោទប្រកាន់ដោយគ្មានមូលដ្ឋាន” ក្នុងការផ្តាច់ទំនាក់ទំនងនយោបាយជាមួយអ៊ីរ៉ង់គឺជា “សកម្មភាពដែលបានគណនាខុស និងមើលឃើញខ្លី” នៅក្នុងទំនាក់ទំនងអន្តរជាតិ។
សេចក្តីថ្លែងការណ៍របស់ក្រសួងបានបន្ថែមថា របៀបនៃការចោទប្រកាន់ត្រូវបានប្រឌិតប្រឆាំងនឹងអ៊ីរ៉ង់ដោយភាគីទីបី បង្ហាញថារដ្ឋមួយចំនួន ដែល “ជាអ្នកគាំទ្រភេរវកម្ម និងមានទំនោរបង្កការបះបោរ” បានជាប់ពាក់ព័ន្ធក្នុងបញ្ហានេះ។
កាលពីថ្ងៃពុធ នាយករដ្ឋមន្ត្រីអាល់បានីលោក Edi Rama បានប្រកាសពីការសម្រេចចិត្តបញ្ចប់ទំនាក់ទំនងការទូតជាមួយអ៊ីរ៉ង់ បន្ទាប់ពីអាជ្ញាធរបានរកឃើញថា អ៊ីរ៉ង់ជាអ្នកនៅពីក្រោយការវាយប្រហារតាមអ៊ីនធឺណេតកាលពីថ្ងៃទី១៥ ខែកក្កដា នៅលើគេហទំព័ររបស់រដ្ឋាភិបាលអាល់បានី ដោយផ្តល់ឱ្យអ្នកការទូត និងបុគ្គលិកស្ថានទូតអ៊ីរ៉ង់ ២៤ ម៉ោងដើម្បីចាកចេញពីប្រទេស៕
ប្រែសម្រូល ឈូក បូរ៉ា
