បរទេស៖ ក្រសួងការពារជាតិរុស្ស៊ី បានអះអាងកាលពីថ្ងៃសៅរ៍ថា អ្នកប្រយុទ្ធជាជនបរទេសរហូតដល់ ៣០០នាក់ ដែលប្រយុទ្ធដើម្បីក្រុងគៀវប្រឆាំងនឹងទីក្រុងមូស្គូ ត្រូវបានសម្លាប់នៅក្នុងតំបន់ Nikolayev ភាគខាងត្បូងប្រទេសអ៊ុយក្រែន។
យោងតាមសារព័ត៌មាន RT ចេញផ្សាយនៅថ្ងៃទី២៤ ខែកញ្ញា ឆ្នាំ២០២២ បានឱ្យដឹងថា អ្នកនាំពាក្យក្រសួងការពារជាតិក
រុស្ស៊ី លោកឧត្តមសេនីយឯក Igor Konashenkov បានប្រកាសក្នុងអំឡុងពេលសន្និសីទប្រចាំថ្ងៃថា “ក្រុមសកម្មប្រយុទ្ធរហូតដល់ ៣០០ នាក់ ត្រូវបានសម្លាប់ដោយការវាយប្រហារដោយកាំជ្រួច លើចំណុចនៃការដាក់ពង្រាយបណ្តោះអាសន្ន នៃទាហានស៊ីឈ្នួលបរទេសនៅក្នុងតំបន់នៃភូមិ Kalinovka តំបន់ Nikolayev” ។
អ្នកប្រយុទ្ធបរទេសមួយចំនួនធំ ត្រូវបានគេរាយការណ៍ថា បានបាត់បង់ជីវិតក្នុងការប្រយុទ្ធ ដើម្បីអ៊ុយក្រែន។ កាលពីដើមសប្តាហ៍នេះ រដ្ឋមន្ត្រីការពារជាតិរុស្ស៊ីលោក Sergey Shoigu បានអះអាងថា កងកម្លាំងរុស្ស៊ី និងកងជីវពលនៃសាធារណរដ្ឋ Donbass បានសម្លាប់ទាហានស៊ីឈ្នួលបរទេសជាង ២ ០០០ នាក់។
យោងតាមលោករដ្ឋមន្ត្រីបានឱ្យដឹងថា គិតត្រឹមថ្ងៃទី ២១ ខែកញ្ញា ជនបរទេសចំនួន ១ ០០០នាក់ នៅតែស្ថិតក្នុងជួរនៃយោធាអ៊ុយក្រែន ខណៈដែលនៅក្នុងខែមេសា ចំនួននេះត្រូវបានប៉ាន់ប្រមាណថា មានចំនួន ៣ ០០០ នាក់ ។ ការធ្វើការប្រហារតាមដែនអាកាស កាលពីថ្ងៃសៅរ៍នឹងបន្សល់ទុកតែ ៧០០នាក់ប៉ុណ្ណោះ តាមការគណនាទាំងនោះ៕
