ព័ត៌មានអន្តរជាតិ

នាយករដ្ឋមន្ត្រីម៉ាឡេស៊ី បញ្ជាឲ្យធ្វើការស៊ើបអង្កេត ទៅលើការប្រព្រឹត្តខុស របស់អតីតព្រះរាជអាជ្ញាកំពូល

កូឡាឡាំពួរ៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី៣០ ខែកញ្ញា ឆ្នាំ២០២២ថា នៅថ្ងៃសុក្រនេះ លោក Ismail Sabri Yaakob នាយករដ្ឋមន្ត្រីម៉ាឡេស៊ី បានបញ្ជាឱ្យមានការស៊ើបអង្កេតលើ ការប្រព្រឹត្តខុសដែលអាច កើតមានដោយអតីតព្រះរាជអាជ្ញាកំពូល ដែលបាននាំយកសំណុំរឿង ពុករលួយប្រឆាំងនឹងសមាជិក ជាន់ខ្ពស់មួយចំនួននៃគណបក្ស United Malays National Organisation (UMNO) ដែលកាន់អំណាចរបស់គាត់ ។

លោកនាយករដ្ឋមន្ត្រីបានថ្លែង នៅក្នុងសេចក្តីថ្លែងការណ៍មួយថា លោក Tommy Thomas ដែលបម្រើការជាអគ្គមេធាវី ចន្លោះឆ្នាំ២០១៨ និង២០២០ នឹងត្រូវបានស៊ើបអង្កេតចំពោះការបះបោរ ការបង្ហាញអាថ៌កំបាំងរបស់ រដ្ឋាភិបាលដោយគ្មានការអនុញ្ញាត និងការរំលោភបំពានសិទ្ធិអំណាច ។

លោក Ismail Sabri បានប្រឈមមុខនឹងសម្ពាធពីសមាជិក UMNO មួយចំនួនដើម្បីស៊ើបអង្កេត Thomas ដែលបានរៀបរាប់លម្អិត នៅក្នុងសៀវភៅអនុស្សាវរីយ៍ កាលពីឆ្នាំមុនអំពីការសម្រេចចិត្ត សំខាន់ៗមួយចំនួនដែលគាត់ បានធ្វើអំឡុងពេលគាត់ កាន់តំណែងជាអគ្គមេធាវី ។

ទាំងនេះរួមបញ្ចូលការចោទប្រកាន់ ពីបទពុករលួយប្រឆាំងនឹងប្រធាន UMNO លោក Ahmad Zahid Hamidi និងអតីតនាយករដ្ឋមន្ត្រី Najib Razak ដែលបច្ចុប្បន្នកំពុងជាប់ពន្ធនាគារ ក្នុងចំណោមអ្នកផ្សេងទៀត ។

លោក Ahmad Zahid និងលោក Najib ដែលបដិសេធមិនធ្វើខុស បានលើកឡើងថា ការចោទប្រកាន់លើពួកគេ គឺជាហេតុផលនយោបាយ ។ បុរសទាំង២នាក់ នៅតែមានឥទ្ធិពលខ្លាំង ហើយស្ថិតក្នុងចំណោមសមាជិកបក្ស ដែលអំពាវនាវឱ្យមានការ ស៊ើបអង្កេតលើរូបលោក Thomas ។

លោក Thomas បានបដិសេធមិនធ្វើអត្ថាធិប្បាយ នៅពេលត្រូវបានទាក់ទង ដោយទីភ្នាក់ងារព័ត៌មាន Reuters ។

ការស៊ើបអង្កេតនេះបាន កើតឡើងនៅគ្រាដែលលោក Ismail Sabri ប្រឈមមុខនឹងការទាមទារ ដាច់ដោយឡែកពី UMNO ដើម្បីអំពាវនាវឱ្យមានការ បោះឆ្នោតមុនកាលកំណត់ ដើម្បីទាញយកប្រយោជន៍ ពីភាពជោគជ័យរបស់ខ្លួននៅក្នុង ការបោះឆ្នោតក្នុងស្រុកនាពេលថ្មីៗនេះ ៕

ប្រែសម្រួលដោយ៖ ម៉ៅ បុប្ផាមករា

To Top