គៀវ៖ ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានចុះហត្ថលេខាលើក្រឹត្យមួយ ដើម្បីដាក់ឱ្យចូលជាធរមាន នូវសេចក្តីសម្រេចរបស់ក្រុមប្រឹក្សាសន្តិសុខ និងការពារជាតិ (NSDC) ដែលច្រានចោលការចរចាណាមួយ ជាមួយប្រធានាធិបតីរុស្ស៊ីលោក វ្លាឌីមៀ ពូទីន។
ឯកសារដែលបានចេញផ្សាយ នៅលើគេហទំព័ររបស់លោក ហ្សេឡិនស្គី បានឲ្យដឹងថា NSDC របស់អ៊ុយក្រែន បានចាត់ទុកការពិភាក្សាជាមួយលោក ពូទីន “មិនអាចទៅរួចនោះទេ” ។
ជាមួយនឹងក្រឹត្យរបស់លោកខាងលើនេះ លោក ហ្សេឡិនស្គី ក៏បានណែនាំរដ្ឋាភិបាល ឱ្យរៀបចំសំណើ សម្រាប់ការបង្កើតប្រព័ន្ធធានា សន្តិសុខពហុកម្រិត ដែលត្រូវបានរចនាឡើង ដើម្បីជំរុញសក្តានុពលការពារជាតិ របស់អ៊ុយក្រែន។
កាលពីថ្ងៃទី៣០ ខែកញ្ញា NSDC បានអនុម័តសេចក្តីសម្រេចមួយ ក្នុងគោលបំណងធានាសន្តិសុខអ៊ុយក្រែន និងស្ដារឡើងវិញនូវ បូរណភាពទឹកដីរបស់ខ្លួន បន្ទាប់ពីការទទួលស្គាល់ជាផ្លូវការ របស់ទីក្រុងម៉ូស្គូចំពោះ តំបន់អ៊ុយក្រែនចំនួន ៤ ដែលត្រូវបានគ្រប់គ្រងដោយផ្នែក ដោយរុស្ស៊ីជាទឹកដីរបស់រុស្ស៊ី។
គួរបញ្ជាក់ថា អ្នកចរចាអ៊ុយក្រែននិងរុស្ស៊ី បានបើកកិច្ចចរចាសន្តិភាពទល់មុខគ្នា ចុងក្រោយបង្អស់នៅក្រុងអ៊ីស្តង់ប៊ុល ប្រទេសតួកគីកាលពីថ្ងៃទី២៩ ខែមីនា ៕
ប្រែសម្រួល ឈូក បូរ៉ា
