យូអិន៖ អគ្គលេខាធិការអង្គការសហប្រជាជាតិ លោក Antonio Guterres មានការតក់ស្លុត និងសោកស្ដាយ ចំពោះការបាញ់ប្រហារ ដ៏ធំដ៏គួរឱ្យរន្ធត់នៅឯកន្លែង ថែទាំកុមារមួយកន្លែង នៅភាគឦសានប្រទេសថៃ នេះបើតាមអ្នកនាំពាក្យរបស់លោក។
លោក Stephane Dujarric អ្នកនាំពាក្យបានឲ្យដឹង នៅក្នុងសេចក្តីថ្លែងការណ៍មួយថា “លោកអគ្គលេខាធិការ សូមចូលរួមរំលែកទុក្ខដល់ ក្រុមគ្រួសារនៃជនរងគ្រោះ និងសូមជូនពរអ្នករបួសឱ្យ ឆាប់ជាសះស្បើយ” ។
អាជ្ញាធរក្នុងតំបន់បានឲ្យដឹងថា យ៉ាងហោចណាស់មនុស្ស ៣៨នាក់ត្រូវបានសម្លាប់ នៅក្នុងការបាញ់ប្រហារដ៏ធំមួយ នៅឯមជ្ឈមណ្ឌលថែទាំកុមារមួយក្នុងខេត្ត Nong Bua Lamphu ភាគឦសានប្រទេសថៃ កាលពីថ្ងៃព្រហស្បតិ៍ ដែលភាគច្រើនជាកុមារ។
ប៉ូលិសបានកំណត់អត្តសញ្ញាណ អ្នកវាយប្រហារនោះថា ជាអតីតមន្ត្រីប៉ូលិសដែលបាន រាយការណ៍ថា បានសម្លាប់ខ្លួននៅពេលក្រោយបើកការបាញ់ប្រហារ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ការវាយប្រហារដ៏គួរឱ្យរន្ធត់នេះ បានជំរុញឱ្យមានការថ្កោលទោសយ៉ាងខ្លាំង ពីភ្នាក់ងារនានារបស់ អង្គការសហប្រជាជាតិ។
នៅក្នុងសេចក្តីថ្លែងការណ៍មួយ មូលនិធិកុមាររបស់ អង្គការសហប្រជាជាតិ (UNICEF) បានឲ្យដឹងថា ខ្លួនថ្កោលទោសគ្រប់ទម្រង់ នៃអំពើហឹង្សាលើកុមារ ដោយសង្កត់ធ្ងន់ថា “កុមារគួរតែមិនមែនជាគោលដៅ ឬសាក្សីនៃអំពើហិង្សានៅគ្រប់ទីកន្លែង គ្រប់ពេលវេលា” ។
សេចក្តីថ្លែងការណ៍បានបន្ថែមថា “អង្គការយូនីសេហ្វ សូមចូលរួមរំលែកទុក្ខដ៏ក្រៀមក្រំ និងការអាណិតអាសូរ យ៉ាងជ្រាលជ្រៅបំផុត ចំពោះគ្រួសារដែលបាន បាត់បង់មនុស្សជាទីស្រលាញ់ និងអ្នករបួស។ យើងចូលរួមជាមួយប្រជាជនទាំងអស់ នៅក្នុងប្រទេសថៃ ក្នុងការកាន់ទុក្ខ ហើយសង្ឃឹមថា អ្នករងគ្រោះទទួលបានការគាំទ្រសមស្រប និងទាន់ពេលវេលា” ៕
ប្រែសម្រួល ឈូក បូរ៉ា
