ព័ត៌មានអន្តរជាតិ

បទត្ថាធិប្បាយ៖ វិបុលភាពគ្រប់ជ្រុងជ្រោយ នៃសង្គមនិយមតាមបែបផែនចិន

ថ្ងៃទី១៦ ខែតុលា ឆ្នាំ២០២២ សមាជលើកទី២០របស់បក្សកុម្មុយនិស្តចិនត្រូវបានបើកដំណើរការ ដែលពិភពលោកកំពុងតាមដានយ៉ាងយកចិត្តទុកដាក់និងចូលរួមនៅក្នុងអំណរសាទរសមិទ្ធផលថ្មីនានាបន្ថែមទៀតដែលនឹងសម្រេចបានក្រោយលទ្ធផលនៃសមាជដែលពោរពេញដោយកម្លាំងចលករនៅក្នុងចរន្តនៃការអភិវឌ្ឍសកលដែលជាគំនិតផ្តួចផ្តើមដ៏មានសារៈសំខាន់បំផុតរបស់បក្សកុម្មុយនិស្តចិនដែលមានលោក ស៊ី ជីនភីង ជាស្នូល។


ចាប់តាំងពីថ្ងៃបង្កើតនាថ្ងៃទី១ ខែកក្កដា ឆ្នាំ១៩២១ បក្សកុម្មុយនិស្តចិនបានសម្រេចការសន្យារបស់ខ្លួនប្រកបដោយប្តេជ្ញាចិត្តខ្ពស់និងជាឧឡារិកចំពោះប្រវត្តិសាស្ត្រនិងប្រជាជាតិចិនក្នុងការសម្រេចបាននូវគោលដៅទី១សម្រាប់សតវត្សរ៍ ក្នុងការកសាងបាននូវសង្គមមួយដែលមានជីវភាពធូរធារកម្រិតមធ្យមលើគ្រប់វិស័យ ដែលជាពិសេសគឺការលុបបំបាត់ភាពក្រីក្រទាំងស្រុងនៅក្នុងប្រទេសចិនដោយត្រូវគេបានប៉ាន់ប្រមាណថាប្រជាជនចិនជាង៩៦លាននាក់បានក្រោកចាកផុតពីភាពក្រីក្រ។

ដោយឡែកប្រសិនជាយើងក្រឡេកមើលប្រទេសចិនកាលពី១០ឆ្នាំមុន យើងនឹងយល់កាន់តែច្បាស់ពីការដឹកនាំរបស់បក្សកុម្មុយនិស្តចិនដែលមានលោក ស៊ី ជីនភីង ជាស្នូលក្នុងកំណែទម្រង់យ៉ាងស៊ីជម្រៅប្រកបដោយត្រីវិស័យយ៉ាងត្រឹមត្រូវនិងគំនិតផ្តួចផ្តើមប្រកបដោយប្រសិទ្ធភាពនិងប្រសិទ្ធផលដ៏មហិមាក្នុងការជំរុញល្បឿននៃការធ្វើទំនើបភាវូបនីយកម្មសង្គមនិយមដែលបានដាក់គ្រឹះយ៉ាងរឹងមាំដោយបង្កើតលក្ខខណ្ឌ អំណោយផល និង កាលានុវត្តភាពដ៏សំខាន់ក្នុងមហាដំណើរទៅកាន់ការស្តារឡើងវិញនៃភាពអស្ចារ្យរបស់ប្រជាជាតិចិនតាមគោលមាគ៌ាសង្គមនិយមដែលមានចរិតលក្ខណៈចិន ឬសង្គមនិយមតាមបែបផែនចិន។


ក្នុងរយៈពេល១០ឆ្នាំកន្លងមកនេះ ដោយប្រកាន់ខ្ជាប់នូវលទ្ធិម៉ាក្សនិយម ឧត្តមគតិម៉ៅសេទុង ទ្រឹស្ដីតេងស៊ាវពីង គំនិតសំខាន់នៃតំណាងបី និងទស្សនវិស័យវិទ្យាសាស្ត្រស្តីពីការអភិវឌ្ឍ សង្គមនិយមជាមួយនឹងចរិតលក្ខណៈរបស់ចិនបានឈានចូលដល់យុគសម័យថ្មី។ គំនិតផ្តួចផ្តើមជាច្រើនរួមមាន គំនិតផ្តួចផ្តើមខ្សែក្រវាត់និងផ្លូវ គំនិតផ្តួចផ្តើមអភិវឌ្ឍសកល គំនិតផ្តួចផ្តើមសន្តិសុខសកល គំនិតផ្តួចផ្តើមសហគមន៍ជោគវាសនារួម គំនិតផ្តួចផ្តើមសហគមន៍រួមជីវិត សុទ្ធសឹងបាននិងកំពុងអនុវត្តយ៉ាងពេញលេញ ព្រមទាំងបានលេចចេញនូវសមិទ្ធផលជាច្រើនមហិមាដូចដែលទៅនឹងប្រសាសន៍របស់លោក ស៊ី ជីនភីង អគ្គលេខាធិការបក្សដែលបានថ្លែងនាថ្ងៃទី១៦ ខែតុលា ឆ្នាំ២០២២ ក្នុងពិធីបើកសមាជលើកទី២០របស់បក្សកុម្មុយនិស្តចិន។

ពិភពលោកបានកត់សម្គាល់ឃើញថា ប្រទេសចិនបានក្លាយទៅជាដៃគូពាណិជ្ជកម្មសំខាន់របស់ប្រទេសនិងតំបន់ជាង១៤០ ទំហំពាណិជ្ជកម្មទំនិញសរុបស្ថិតក្នុងចំណាត់ថ្នាក់ទី១ ទំហំកៀរគរទុន វិនិយោគបរទេសនិងការបណ្តាក់ទុនចំពោះក្រៅប្រទេសបាននាំមុខលើលោក ដែលបានកកើតទៅជាទ្រង់ទ្រាយបើកចំហចំពោះក្រៅប្រទេសដែលប្រកបដោយក្របខ័ណ្ឌកាន់តែធំ វិស័យកាន់តែរីកទូលាយ និងកាន់តែស៊ីជម្រៅ ។

ក្នុងរយៈពេល១០ឆ្នាំកន្លងមកនេះ ផលិតផលក្នុងស្រុកសរុបប្រទេសចិនបានកើនឡើងពី៥៤ទ្រីលានដល់១១៤ទ្រីលានយាន់ប្រាក់ចិន ហើយទំហំសេដ្ឋកិច្ចសរុបនៃប្រទេសចិនត្រូវជា១៨ក្បៀស៥នៃទំហំសេដ្ឋកិច្ចពិភពលោកពោលគឺកើនឡើង៧ក្បៀស២ដែលស្ថិតក្នុងចំណាត់ថ្នាក់ទី២លើពិភពលោក ។


ពិភពលោកបានដឹងយ៉ាងច្បាស់ថា ទ្វាររបស់ចិនគឺបើកចំហនិងបើកកាន់តែធំសម្រាប់ចូលរួមក្នុងចរន្តនៃការអភិវឌ្ឍរបស់ពិភពលោកដែលនេះជាសញ្ញាបង្ហាញដល់ប្រវត្តិសាស្ត្រមនុស្សជាតិបាននិងកំពុងបើកទំព័រថ្មីជាច្រើនបន្ថែមទៀតកត់បញ្ចូលនូវអភិបាលកិច្ចប្រទេសចិនដែលបានត្រួសត្រាយនិងបានដឹកនាំដោយលោក ស៊ី ជីនភីង ជាស្នូល ជាអគ្គមគ្គុទេសក៍ ជារដ្ឋបុរស ជាអ្នកផលិតនំខេកផលប្រយោជន៍កាន់តែធំ ជាអ្នកកាច់ចង្កូតនាវាប្រទេសចិននិងចូលរួមដល់ការពង្រីកទំហំអង្កត់ផ្ចិតកាន់តែធំដល់ការអភិវឌ្ឍសកលរបស់ពិភពលោក។


ពិភពលោកកំពុងចូលរួមទះដៃអបអរសាទរដល់សមាជលើកទី២០របស់បក្សកុម្មុយនិស្តចិនដែលលទ្ធផលនៃអង្គសមាជនេះនឹងពង្រីកប្រសិទ្ធភាពនៃវិសាលភាពគំនិតផ្តួចផ្តើមនានាដែលបានរំលេចដោយលោក ស៊ី ជីនភីង ហើយបាននិងកំពុងក្លាយជាទស្សនវិជ្ជានៃការអភិវឌ្ឍសកលក្នុងការបង្កើនពន្លឿនអព្ភូតហេតុដ៏អស្ចារ្យសម្រាប់ជាការលើកទឹកចិត្តឲ្យប្រជាជាតិចិនដែលកំពុងមានជីវភាពធូរធាររួមកម្លាំងគ្នាប្រកបដោយមោទកភាពក្នុងការកសាងប្រទេសចិនតាមមាគ៌ាសង្គមនិយមទំនើបកម្មប្រកបដោយវិបុលភាពគ្រប់ជ្រុងជ្រោយ។ សង្គមនិយមតាមបែបផែនចិនកំពុងបញ្ចេញនូវឫទ្ធានុភាពដ៏រឹងមាំថ្មីនៅក្នុងសតវត្សរ៍ទី២១នេះ ដែលជាជម្រើសដ៏ត្រឹមត្រូវស្របតាមមាគ៌ានៃការអភិវឌ្ឍក្នុងបុព្វហេតុដ៏ថ្លៃថ្លានៃស្ថិរភាពនយោបាយ ការថែរក្សាសន្តិភាពនិងការអភិវឌ្ឍរបស់មនុស្សជាតិ ហើយក៏ជាមហាវិថីឆ្ពោះទៅសម្រេចបាននូវគោលដៅទី២ប្រចាំសតវត្សរ៍នៃការស្តារភាពអស្ចារ្យនៃប្រជាជាតិចិនឡើងវិញផងដែរ៕

ដោយបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន

To Top