វ៉ាស៊ីនតោន៖ គណៈកម្មាធិការជ្រើសរើសសភាអាមេរិក ដែលស៊ើបអង្កេតកុប្បកម្ម វិមានកាពីតូលកាលពីឆ្នាំមុន បានចេញដីកាកាលពីថ្ងៃសុក្រ ទៅកាន់អតីតប្រធានាធិបតី សហរដ្ឋអាមេរិកលោក ដូណាល់ ត្រាំ ។
ការផ្លាស់ប្តូរនេះបានធ្វើឡើង ជាងមួយសប្តាហ៍បន្ទាប់ពី ក្រុមប្រឹក្សាបានបោះឆ្នោតជាឯកច្ឆ័ន្ទ ដើម្បីស្វែងរកសក្ខីកម្ម និងឯកសារពាក់ព័ន្ធនឹងការ ស៊ើបអង្កេតលើឧប្បត្តិហេតុ នៅថ្ងៃទី៦ ខែមករា ឆ្នាំ២០២១ និងមូលហេតុរបស់វា។
ដីកាទៅលោក ត្រាំ តម្រូវឱ្យផលិតឯកសារទៅ គណៈកម្មាធិការត្រឹមថ្ងៃទី៤ ខែវិច្ឆិកា ហើយត្រូវបង្ហាញខ្លួន សម្រាប់ការផ្តល់សក្ខីកម្មដែលចាប់ផ្តើមនៅ ឬប្រហែលថ្ងៃទី១៤ ខែវិច្ឆិកា។
ប្រធានគណៈកម្មាធិការលោក Bennie Thompson និងអនុប្រធាន Liz Cheney នៅក្នុងលិខិតមួយបានចោទប្រកាន់លោក ត្រាំ ពីបទរៀបចំ និងត្រួតពិនិត្យផ្ទាល់ខ្លួន “កិច្ចខិតខំប្រឹងប្រែងពហុផ្នែក ដើម្បីផ្តួលរំលំការបោះឆ្នោត ប្រធានាធិបតីឆ្នាំ២០២០” ។
លោក ត្រាំ បានរិះគន់គណៈកម្មាធិការ និងសមាជិករបស់ខ្លួន ម្តងហើយម្តងទៀត។ លោកក៏បានចោទសួរអំពីពេលវេលានៃការបោះឆ្នោតរបស់ក្រុមប្រឹក្សាជំនុំជម្រះ ដើម្បីកោះហៅលោកផងដែរ។
នៅថ្ងៃទី៦ ខែមករា ឆ្នាំ២០២១ ហ្វូងអ្នកគាំទ្រលោក ត្រាំ ដ៏ច្រើនបានសម្រុកចូលវិមានកាពីតូល ក្នុងទីក្រុង Washington, D.C. ហើយបានរំខានដល់សម័យប្រជុំរួមនៃសភា ដើម្បីបញ្ជាក់ពីលទ្ធផលបោះឆ្នោត ប្រធានាធិបតីឆ្នាំ២០២០ ៕
ប្រែសម្រួល ឈូក បូរ៉ា
