ប៉ារីស ៖ ប្រធានាធិបតីបារាំងលោក អេម៉ានុយអែល ម៉ាក្រុង បានសន្យាថា “កុំចាកចេញពីបារាំង ដោយគ្មានដំណោះស្រាយ” នៅចំពោះមុខអតិផរណាខ្ពស់ និងកូដកម្ម នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ ។
លោក ម៉ាក្រុង បានឲ្យដឹងក្នុងអំឡុង ពេលបទសម្ភាសន៍មួយ ដែលមានចំណងជើងថា “គ្រាអាសន្នរបស់បារាំង” ដែលបានចាក់ផ្សាយតាមកញ្ចក់ទូរទស្សន៍ជាតិ France 2 ថា “យើងនឹងឆ្លងកាត់ព្យុះ នេះជាមួយគ្នា” ។
លោកបានលើកឡើងថា ប្រទេសនឹងរំពឹងថា នឹងកើនឡើង ១៥ ភាគរយនៃតម្លៃអគ្គិសនី និងឧស្ម័ន នៅដើមឆ្នាំក្រោយ ប៉ុន្តែរដ្ឋាភិបាល នឹងបន្តការការពារតម្លៃថាមពល ហើយនឹងជួយដល់សិស្សានុសិស្ស គ្រួសារដែលមានប្រាក់ចំណូលទាប និងមធ្យម ព្រមទាំងអាជីវកម្មផងដែរ។
លោក ម៉ាក្រុង បានបន្ដថា យុទ្ធសាស្ត្ររបស់រដ្ឋាភិបាលគឺ “ស្ថិរភាពការចំណាយសាធារណៈ សងបំណុលរបស់យើង រក្សាកំណើន បង្កើតការងារ និងកាត់បន្ថយពន្ធ” ។ លោកសន្យាថា នឹងបង្កើតឱកាសការងារបន្ថែមទៀតដល់យុវជន។
លោកប្រធានាធិបតី បានអំពាវនាវឱ្យមាន “ការសន្ទនាសង្គម” ដើម្បីការពារ និងបញ្ចប់កូដកម្ម ជាពិសេសថ្មីៗនេះ ដែលបង្កឱ្យមានការភ័យ ស្លន់ស្លោទូទាំងប្រទេស។
លោក ម៉ាក្រុង ក៏បានការពារកំណែទម្រង់ សោធននិវត្តន៍នៃការបង្កើន អាយុចូលនិវត្តន៍ដល់ ៦៥ ។ បើមិនដូច្នេះទេ ការរួមចំណែកសោធននិវត្តន៍នឹងត្រូវកើនឡើង ឬប្រាក់សោធននិវត្តន៍ របស់មនុស្សចាស់នឹងត្រូវកាត់បន្ថយ៕
