គៀវ៖ លេខាធិការក្រុមប្រឹក្សា សន្តិសុខបេឡារុស្ស លោក Alexander Volfovich បានព្រមានថា សង្គ្រាមកាន់តែធំអាចផ្ទុះឡើងនៅអឺរ៉ុប នេះបើយោងតាមការចុះផ្សាយ របស់ទីភ្នាក់ងារសារព័ត៌មាន Newsweek។
ទីភ្នាក់ងារសារព័ត៌មាន BelTA បានរាយការណ៍ថា លោក Volfovich ដែលជាសម្ព័ន្ធមិត្ត របស់ប្រធានាធិបតីរុស្ស៊ី លោក វ្លាឌីមៀ ពូទីន បានប្រាប់អ្នកយកព័ត៌មាន កាលពីថ្ងៃព្រហស្បតិ៍ថា ប្រទេសបេឡារុស្ស មានការព្រួយបារម្ភ ចំពោះ “ការធ្វើយោធារបស់ប្រទេសប៉ូឡូញ” និង “ចេតនាឈ្លានពាន” របស់ខ្លួន។
បេឡារុស្ស ត្រូវបានរុស្ស៊ីប្រើជាទីតាំង ត្រៀមបញ្ជូនកាំជ្រួច និងទាហានចូលអ៊ុយក្រែន ប៉ុន្តែប្រទេសនេះមិនបាន ចូលរួមដោយផ្ទាល់ក្នុងសង្រ្គាមនោះទេ។
ភាពតានតឹងបានកើនឡើងកាលពីខែមុន ដោយប្រធានាធិបតីបេឡារុស្សលោក Alexander Lukashenko បានប្តេជ្ញាថានឹងធ្វើប្រតិបត្តិការ រួមគ្នាជាមួយកងកម្លាំងរុស្ស៊ី។ នោះបានជំរុញឱ្យបញ្ជាការកងកម្លាំង ប្រដាប់អាវុធអ៊ុយក្រែន ជំរុញជាសាធារណៈដល់បេឡារុស្ស កុំឱ្យចូលរួមក្នុងសង្គ្រាម របស់រុស្ស៊ីប្រឆាំងនឹងអ៊ុយក្រែន ដោយព្រមានថា ក្រុងកៀវនឹងសងសឹកប្រសិនបើវាកើតឡើងមែននោះ។
លោក Volfovich បានលើកឡើងថា ប្រទេសបេឡារុស្សមានការព្រួយបារម្ភ អំពីការគំរាមកំហែងដល់ សន្តិសុខរបស់ខ្លួន។ លោកបានបន្ដថា “ក្នុងនាមជាប៉ុស្តិ៍មួយ នៅក្នុងតំបន់អឺរ៉ុបខាងកើត នៃសន្តិសុខសមូហភាព បេឡារុស្សបានជួបប្រទះ ជាអកុសលរាល់បញ្ហាប្រឈម និងការគំរាមកំហែងផ្នែកសន្តិសុខទាំងអស់” ។ “ជាដំបូង យើងព្រួយបារម្ភអំពីវត្តមានយោធា នៅលើទឹកដីនៃរដ្ឋជិតខាង និងវោហាសាស្ត្រយោធាពី ប្រទេសជិតខាងរបស់យើង”។
លោក Volfovich បានព្រមានសមាជិកណាតូប៉ូឡូញថា ប្រសិនបើខ្លួនបញ្ចេញ “ការឈ្លានពាន” សង្គ្រាមដែលនឹងកើតឡើងមិនត្រឹមតែ ប៉ះពាល់ដល់ទឹកដីបេឡារុស្សប៉ុណ្ណោះទេ ថែមទាំងអឺរ៉ុបខាងកើតទាំងមូលផងដែរ ៕
ប្រែសម្រួល ឈូក បូរ៉ា
