វ៉ាស៊ីនតោន៖ មន្ត្រីជាន់ខ្ពស់អាមេរិកមួយរូបបានឲ្យដឹងថា ប្រធានាធិបតីសហរដ្ឋអាមេរិកលោក ចូ បៃដិន គ្រោងនឹងជំរុញឱ្យប្រធានាធិបតីចិនលោក ស៊ី ជីនពីង ធ្វើការដើម្បីទប់ស្កាត់ការញុះញង់នុយក្លេអ៊ែរ និងមីស៊ីលរបស់កូរ៉េខាងជើង នៅពេលមេដឹកនាំទាំងពីរ ជួបគ្នានៅប្រទេសឥណ្ឌូនេស៊ី នៅសប្តាហ៍ក្រោយ។
កូរ៉េខាងជើង ក៏នឹងក្លាយជាប្រធានបទសំខាន់ផងដែរ នៅពេលដែលលោក បៃដិន ជួបជាមួយសមភាគីជប៉ុន និងកូរ៉េខាងត្បូង ដែលជាផ្នែកមួយនៃភាពចលាចល នៃទំនាក់ទំនងការទូតដែលធ្វើឡើង នៅគែមនៃកិច្ចប្រជុំអន្តរជាតិ នៅអាស៊ីអាគ្នេយ៍ នេះបើយោងតាមទីប្រឹក្សា សន្តិសុខជាតិលោក Jake Sullivan ។
លោក Sullivan បានលើកឡើងថា លោករំពឹងថា កិច្ចសហប្រតិបត្តិការសន្តិសុខ “ត្រូវបានពង្រឹង” នឹងត្រូវបានយល់ព្រមក្នុងអំឡុង ពេលកិច្ចចរចាត្រីភាគី នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
លោក បៃដិន នឹងជួបជាមួយលោក ស៊ី នៅក្រៅកិច្ចប្រជុំកំពូលនៃ ក្រុមប្រទេសសេដ្ឋកិច្ចធំៗទាំង២០ នៅលើកោះរមណីយដ្ឋានបាលី។ ជំនួបត្រីភាគីជាមួយនាយករដ្ឋមន្ត្រីជប៉ុន លោក Fumio Kishida និងប្រធានាធិបតីកូរ៉េខាងត្បូង Yoon Suk Yeol នឹងប្រព្រឹត្តទៅនៅប្រទេសកម្ពុជា នៅថ្ងៃអាទិត្យនេះ ។
ខណៈពេលដែលកិច្ចប្រជុំរវាងលោក បៃដិន និងលោក ស៊ី ត្រូវបានគេរំពឹងថា នឹងប៉ះលើបញ្ហាក្នុងតំបន់ និងសកលលោកជាច្រើន រួមទាំងតៃវ៉ាន់ ប្រធានាធិបតីអាមេរិកនឹង “លើកឡើងពីបញ្ហាកូរ៉េខាងជើង” យ៉ាងពិតប្រាកដ នៅពេលដែលទីក្រុងព្យុងយ៉ាង ធ្វើការសាកល្បងមីស៊ីលផ្លោងក្នុងល្បឿន ដែលមិនធ្លាប់មានពីមុនមកក្នុងឆ្នាំនេះ ។
ទីក្រុងព្យុងយ៉ាង ក៏ត្រូវបានគេជឿថា បានធ្វើការត្រៀមខ្លួនសម្រាប់អ្វីដែល នឹងជាការសាកល្បងនុយក្លេអ៊ែរ ជាលើកដំបូងរបស់ខ្លួនចាប់តាំងពីខែកញ្ញាឆ្នាំ ២០១៧ និងជាលើកទី៧។
លោក Sullivan បានបន្ថែមថា លោក បៃដិន គ្រោងនឹងប្រាប់លោក ស៊ី ថាប្រទេសកូរ៉េខាងជើងតំណាងឱ្យ “ការគំរាមកំហែង” មិនត្រឹមតែ ចំពោះសហរដ្ឋអាមេរិក និងសម្ព័ន្ធមិត្តជិតស្និទ្ធបំផុត របស់ខ្លួននៅអាស៊ីប៉ុណ្ណោះទេ ប៉ុន្តែសម្រាប់ “សន្តិភាព និងស្ថិរភាពនៅទូទាំងតំបន់ទាំងមូល” ៕
ប្រែសម្រួល ឈូក បូរ៉ា
