បរទេស៖ ទីស្នាក់ការយោធាអាមេរិកមួយ កន្លែងក្នុងប្រទេសស៊ីរី បានទទួលរងការបាញ់ប្រហារ ដោយគ្រាប់មីស៊ីល, នេះបើយោងតាមបញ្ជាការកណ្តាល របស់សហរដ្ឋអាមេរិក ចំពេលមានការកើនឡើងនៃអំពើហិង្សារវាងតួកគី និងកងជីវពលឃឺដ ក្នុងតំបន់។
យោងតាមសារព័ត៌មាន RT ចេញផ្សាយនៅថ្ងៃទី២៦ ខែវិច្ឆិកា ឆ្នាំ២០២២ បានឱ្យដឹងថា CENTCOM បាននិយាយនៅក្នុងសេចក្តីថ្លែងការណ៍មួយថា យ៉ាងហោចណាស់មីស៊ីល ចំនួនពីរបានតម្រង់គោលដៅ “មូលដ្ឋានល្បាត” របស់សហរដ្ឋអាមេរិក នៅជិត ទីប្រជុំជន al-Shaddadi នៅភាគឦសានប្រទេសស៊ីរី កាលពីយប់ថ្ងៃសុក្រ ដោយមិនផ្តល់ព័ត៌មានលម្អិត អំពីអ្នកដែលអាចនឹងធ្វើការ វាយប្រហារនោះទេ។
យោធាបាននិយាយថា “ការវាយប្រហារមិនបណ្តាលឱ្យមានរបួស ឬខូចខាតដល់មូលដ្ឋាន ឬទ្រព្យសម្បត្តិរបស់សម្ព័ន្ធ” នោះទេ ដោយកត់សម្គាល់ថា “គ្រាប់រ៉ុក្កែតដែលមិនបានបាញ់លើកទីបី” ត្រូវបានរកឃើញនៅទីតាំងក្បែរនោះ។
អ្នកនាំពាក្យ CENTCOM លោក Joe Buccino បានបន្ថែមថា ការវាយប្រហារបែបនេះបានធ្វើឱ្យកងកម្លាំងចម្រុះ និងប្រជាជនស៊ីវិលប្រឈមនឹងហានិភ័យ និងធ្វើឱ្យខូចដល់ស្ថិរភាព និងសន្តិសុខ ដែលរកបានដោយលំបាក របស់ប្រទេសស៊ីរី និងតំបន់៕
ប្រែសម្រួលៈ ណៃ តុលា
