គៀវ ៖ ទីភ្នាក់ងារ ថាមពលអាតូមិក អន្តរជាតិ (IAEA) នឹងពង្រឹងវត្តមានរបស់ខ្លួន នៅរោងចក្រ ថាមពលនុយក្លេអ៊ែរ (NPPs) ទាំងអស់ក្នុងប្រទេសអ៊ុយក្រែន នេះបើតាមអគ្គនាយក IAEA លោក Rafael Grossi ។
លោកGrossi បានឲ្យដឹង បន្ទាប់ពីកិច្ចប្រជុំ របស់លោកជាមួយរដ្ឋមន្ត្រីការបរទេស អ៊ុយក្រែនលោក Dmytro Kuleba នៅទីក្រុង Bucharest ប្រទេសរ៉ូម៉ានី ថា “IAEA នឹងពង្រឹងវត្តមានរបស់ខ្លួននៅក្នុង NPPs ទាំងអស់របស់អ៊ុយក្រែន ដើម្បីការពារហេដ្ឋារចនាសម្ព័ន្ធ ថាមពលរបស់ប្រទេសនេះ” ។
លោក Grossi បានលើកឡើងថា លោកបន្តធ្វើការជាមួយលោក Kuleba ឆ្ពោះទៅរកការបង្កើត ជាបន្ទាន់នៃតំបន់ការពារ សុវត្ថិភាពនុយក្លេអ៊ែរ និងសន្តិសុខជុំវិញ រោងចក្រថាមពលនុយក្លេអ៊ែរ Zaporizhzhia នៅភាគខាងត្បូងអ៊ុយក្រែន ។
ដោយឡែកលោក Kuleba បានសរសេរលើបណ្ដាញ Twitter ឲ្យដឹងថា សន្តិសុខរបស់បុគ្គលិកអ៊ុយក្រែន ដែលធ្វើការនៅរោងចក្រ ថាមពល Zaporizhzhia NPP ក៏ត្រូវបានគេពិភាក្សា ក្នុងកិច្ចពិភាក្សាដែរ ។
លោករដ្ឋមន្ត្រីបានលើកឡើងថា ក្នុងអំឡុងពេលសន្ទនាជាមួយលោក Grossi លោកបានរំលឹកឡើង វិញពីតម្រូវការ សម្រាប់ការដកកងកម្លាំង របស់រុស្ស៊ីចេញពី Zaporizhzhia NPP ដែលជារោងចក្រ ថាមពលនុយក្លេអ៊ែរ ដ៏ធំបំផុតមួយនៅអឺរ៉ុប ដែលស្ថិតនៅក្រោមការគ្រប់គ្រង របស់កងកម្លាំងរុស្ស៊ី ចាប់តាំងពីខែមីនា ។
គួរបញ្ជាក់ថាទាំងលោក Grossi និងលោក Kuleba បានធ្វើការពិភាក្សា របស់ពួកគេក្នុងអំឡុងពេលកិច្ចប្រជុំ រដ្ឋមន្ត្រីការបរទេសនៃអង្គការ សន្ធិសញ្ញាអាត្លង់ទិកខាងជើង (NATO) នៅទីក្រុង Bucharest ៕
ប្រែសម្រួល ឈូក បូរ៉ា
