ប៉េកាំង៖ អ្នកនាំពាក្យក្រសួងពាណិជ្ជកម្មបានឲ្យដឹងថា ប្រទេសចិន បានសាទរចំពោះសេចក្តីសម្រេចរបស់អង្គការពាណិជ្ជកម្មពិភពលោក (WTO) ដែលថាពន្ធផ្នែកទី២៣២ របស់សហរដ្ឋអាមេរិកលើផលិតផលដែកថែប និងអាលុយមីញ៉ូមរបស់ចិន គឺបំពានច្បាប់របស់ WTO ។
អ្នកនាំពាក្យរូបនេះបានហៅការសម្រេចដោយក្រុមអ្នកជំនាញរបស់ អង្គការពាណិជ្ជកម្មពិភពលោក WTO ថាជាកម្មវត្ថុនិងយុត្តិធម៌ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
សហរដ្ឋអាមេរិក បានដាក់ពន្ធលើការនាំចូលដែកថែប និងអាលុយមីញ៉ូមពីសមាជិក WTO មួយចំនួនក្នុងនាម “សន្តិសុខជាតិ” ចាប់តាំងពីឆ្នាំ២០១៨ មក។ សកម្មភាពបែបនេះ គឺជាការអនុវត្តនៃលទ្ធិឯកតោភាគី និងការការពារនិយម ហើយបណ្តាលឱ្យខូចខាតយ៉ាងធ្ងន់ធ្ងរដល់ការជួញដូរពហុភាគីដែលផ្អែកលើច្បាប់។
អ្នកនាំពាក្យរូបនេះបានបន្ដថា សកម្មភាពទាំងនេះមិនត្រឹមតែប្រឆាំងដោយសមាជិក WTO ជាច្រើនប៉ុណ្ណោះទេ ប៉ុន្តែត្រូវបានរិះគន់យ៉ាងទូលំទូលាយនៅក្នុងសហរដ្ឋអាមេរិក។ នោះបានបង្ហាញថា ឃ្លាលើកលែងសន្តិសុខរបស់ WTO មិនមែនជា “ជម្រក” សម្រាប់ឯកតោភាគីនិយម និងលទ្ធិគាំពារនិយមនោះទេ។
អ្នកនាំពាក្យរូបនេះបានបន្ថែមថា ប្រទេសចិនសង្ឃឹមថា ភាគីអាមេរិកនឹងគោរពសេចក្តីសម្រេចរបស់ក្រុមប្រឹក្សាអ្នកជំនាញ WTO និងអនុវត្តតាមច្បាប់របស់ WTO កែតម្រូវកំហុសរបស់ខ្លួនឱ្យបានឆាប់តាមដែលអាចធ្វើទៅបាន និងធ្វើការជាមួយប្រទេសចិន និងសមាជិក WTO ដទៃទៀតដើម្បីការពារប្រព័ន្ធពាណិជ្ជកម្មពហុភាគី៕
ប្រែសម្រួល ឈូក បូរ៉ា
