ប៉េកាំង៖ ប្រព័ន្ធផ្សព្វផ្សាយរដ្ឋបានឲ្យដឹងថា ប្រធានាធិបតីចិនលោក ស៊ី ជីនពីង កាលពីថ្ងៃសុក្របានអំពាវនាវ ឱ្យមានកិច្ចសន្ទនាក្នុងការដោះស្រាយវិបត្តិអ៊ុយក្រែន ខណៈដែលលោកបានជួបពិភាក្សាតាមអ៊ីនធឺណិត ជាមួយសមភាគីរុស្ស៊ីលោក វ្លាឌីមៀ ពូទីន ដោយលើកឡើងថា ទីក្រុងប៉េកាំងនឹង “ដើរតួនាទីស្ថាបនា” សម្រាប់ដំណោះស្រាយដោយសន្តិវិធី។
លោក ស៊ី ត្រូវបានដកស្រង់សម្តីដែលប្រាប់លោក ពូទីន ដោយទូរទស្សន៍កណ្តាលចិនថា “ផ្លូវទៅកាន់កិច្ចចរចាសន្តិភាពនឹងមិនរលូននោះទេ ប៉ុន្តែដរាបណាការខិតខំប្រឹងប្រែងមិនត្រូវបានបោះបង់នោះទេ អនាគតនៃសន្តិភាពនឹងមានជានិច្ច”។
មេដឹកនាំចិនក៏បានឲ្យដឹងដែរថា ទីក្រុងម៉ូស្គូមិនដែលបដិសេធគំនិតនៃការដោះស្រាយជម្លោះ តាមរយៈការចរចាការទូតនោះទេ ហើយក្រុងប៉េកាំង ពេញចិត្តចំពោះគំនិតនោះ។
បន្ទាប់ពីការលុកលុយរបស់រុស្ស៊ី មកលើប្រទេសជិតខាងរបស់ខ្លួនកាលពីខែកុម្ភៈ ទីក្រុងប៉េកាំង បានបដិសេធមិនថ្កោលទោសទីក្រុងម៉ូស្គូ និងបានប្រឆាំងនឹងការដាក់ទណ្ឌកម្ម ដែលដាក់ដោយប្រទេសលោកខាងលិច ប៉ុន្តែលោក ស៊ី បានសម្តែងការព្រួយបារម្ភរបស់លោកអំពីសង្គ្រាម ហើយបានជំទាស់នឹងការប្រើប្រាស់ ឬគំរាមកំហែងការប្រើប្រាស់ អាវុធនុយក្លេអ៊ែរនៅក្នុងប្រទេសអឺរ៉ុបខាងកើត។
ទីភ្នាក់ងារសារព័ត៌មាន Tass របស់រុស្ស៊ីបានចុះផ្សាយថា ក្នុងអំឡុងកិច្ចពិភាក្សា លោក ពូទីន បានសម្តែងនូវឆន្ទៈសម្រាប់ទីក្រុងម៉ូស្គូ និងទីក្រុងប៉េកាំង ក្នុងការជំរុញកិច្ចសហប្រតិបត្តិការយោធា និងបានសរសើរទំនាក់ទំនងទ្វេភាគីថាជា “ល្អបំផុតដែលមិនធ្លាប់មាន” ។
មេដឹកនាំរុស្ស៊ីក៏បានឲ្យដឹងផងដែរថា “នៅក្នុងបរិបទនៃភាពតានតឹងភូមិសាស្ត្រនយោបាយកើនឡើង សារៈសំខាន់នៃភាពជាដៃគូយុទ្ធសាស្ត្ររុស្ស៊ី-ចិន ដែលជាកត្តាស្ថេរភាពកំពុងកើនឡើង” យោងតាមស្ថានទូតរុស្ស៊ីនៅទីក្រុងប៉េកាំង ដោយយោងទៅលើការដាក់ទណ្ឌកម្ម របស់ប្រទេសលោកខាងលិចមកលើទីក្រុងម៉ូស្គូ៕
ប្រែសម្រួល ឈូក បូរ៉ា