បាងកក៖ ក្នុងនាមជាប្រទេសមួយ ក្នុងចំនោមប្រទេសដែលពឹងផ្អែក លើវិស័យទេសចរណ៍ជាច្រើន ប្រទេសថៃ កំពុងទន្ទឹងរង់ចាំការត្រឡប់មកវិញ នៃភ្ញៀវទេសចរចិន បន្ទាប់ពីមានការប្រកាសកាលពីពេលថ្មីៗនេះ របស់ប្រទេសចិន អំពីការបន្ធូរបន្ថយការរឹតបន្តឹង លើជើងហោះហើរអន្តរជាតិ។
រដ្ឋមន្ត្រីក្រសួងទេសចរណ៍ និងកីឡា លោក Phiphat Ratchakitprakarn បានប្រាប់កាសែត កាលពីថ្ងៃសៅរ៍ថា “យើងមានសេចក្តីសោមនស្សរីករាយណាស់ ដែលបានដឹងថា ប្រទេសចិន នឹងអនុវត្តវិធានការត្រួតពិនិត្យព្រំដែនថ្មី ចាប់ពីថ្ងៃទី០៨ ខែមករា តទៅ នេះគឺជាដំណឹងល្អដែលរង់ចាំ ជាយូរមកហើយ សម្រាប់ប្រទេសថៃ” ។
ក្នុងឆ្នាំ២០១៩ ភ្ញៀវទេសចរចិន មានចំនួន ២៨ ភាគរយនៃភ្ញៀវទេសចរអន្តរជាតិជិត ៤០លាននាក់ នៅក្នុងប្រទេសថៃ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោកបន្តថា ក្រសួងពាក់ព័ន្ធដូចជាទេសចរណ៍ សុខាភិបាល និងដឹកជញ្ជូនត្រូវបានគេរំពឹងថា នឹងសម្របសម្រួល និងរៀបចំសម្រាប់កំណើនភ្ញៀវចិននាពេលខាងមុខនេះ។
យោងតាមទិន្នន័យផ្លូវការរបស់ អាជ្ញាធរទេសចរណ៍ថៃ ការមកដល់របស់អន្តរជាតិ ក្នុងឆ្នាំ២០២២ ត្រូវបានគេរំពឹងថានឹងកើនឡើងដល់ ១១,៥លាននាក់ ដែលលើសពីគោលដៅដំបូងចំនួន ១០លាននាក់ ៕
ប្រែសម្រួល ឈូក បូរ៉ា
