គៀវ៖ សុន្ទរកថាថ្ងៃចូលឆ្នាំសកល របស់ប្រធានាធិបតីរុស្ស៊ីលោក វ្ល៉ាឌីមៀ ពូទីន បង្ហាញថាលោក “នៅតែមិនមានឆន្ទៈ” ដើម្បីពិចារណាដំណោះស្រាយ ដោយសន្តិវិធី ចំពោះសង្រ្គាមនៅអ៊ុយក្រែន នេះបើយោងតាមអង្គភាព អ្នកគិតរបស់សហរដ្ឋអាមេរិក។
វិទ្យាស្ថានសិក្សាសង្រ្គាម ( ISW) បានសរសេរនៅក្នុង របាយការណ៍ថ្មីបំផុតរបស់ខ្លួនថា សុន្ទរកថាប្រចាំឆ្នាំរបស់លោក ពូទីន បានបង្ហាញថាលោក “មិនប្រាកដប្រជាអំពីសមត្ថភាពរបស់លោក ក្នុងការរៀបចំលំហព័ត៌មានរុស្ស៊ី ហើយនៅតែផ្តោតលើការ ផ្តល់ភាពត្រឹមត្រូវនៃសង្រ្គាម និងការចំណាយរបស់វា ចំពោះប្រជាជនរបស់លោក” រយៈពេល ១០ខែបន្ទាប់ពីលោក បានបញ្ជាឱ្យឈ្លានពានអ៊ុយក្រែន ។
នៅក្នុងវីដេអូរយៈពេល ៩នាទីដែលបានបង្ហាញ នៅលើកញ្ចក់ទូរទស្សន៍ ខណៈដែលតំបន់ម៉ោងនីមួយៗរបស់រុស្ស៊ី បានរាប់ថយក្រោយនាទីចុងក្រោយនៃឆ្នាំ២០២២ កាលពីថ្ងៃសៅរ៍ លោក ពូទីន បានបរិហារលោកខាងលិច ចំពោះការឈ្លានពាន និងបានចោទប្រកាន់ប្រទេសនានាថា បានព្យាយាមប្រើប្រាស់ជម្លោះនៅអ៊ុយក្រែន ដើម្បីបំផ្លាញរុស្ស៊ី។
លោកពូទីន បានលើកឡើងថា “ឆ្នាំ២០២២ គឺជាឆ្នាំនៃការសម្រេចចិត្តដ៏លំបាក និងចាំបាច់នៃជំហានសំខាន់ៗ ឆ្ពោះទៅរកការទទួលបានអធិបតេយ្យភាព ពេញលេញរបស់រុស្ស៊ី និងការបង្រួបបង្រួមដ៏មានឥទ្ធិពល នៃសង្គមរបស់យើង”។
លោកបានបន្ថែមថា អនាគតអធិបតេយ្យភាព ឯករាជ្យ និងសុវត្ថិភាពរបស់រុស្ស៊ី គឺអាស្រ័យលើយើងតែលើកម្លាំង និងការប្ដេជ្ញាចិត្តរបស់យើងប៉ុណ្ណោះ៕ ប្រែសម្រួល ឈូក បូរ៉ា
