បរទេស៖ ទាហានថៃម្នាក់បានស្លាប់ និងម្នាក់ទៀតរងរបួសធ្ងន់ធ្ងរ នៅពេលគ្រាប់មីនបានផ្ទុះក្នុងអំឡុងពេល បេសកកម្មបោសសម្អាតមីនមនុស្សធម៌នៅព្រំដែនកម្ពុជា-ថៃ កាលពីថ្ងៃព្រហស្បតិ៍។
យោងតាមសារព័ត៌មានថៃ The Nation ចេញផ្សាយនៅថ្ងៃទី៦ ខែមករា ឆ្នាំ២០២៣ បានឱ្យដឹងថា ពលទាហាន Akkaraphol Phuwadolworanat និង Warongkorn Sri-ngam កំពុងបិសសម្អាតមីនដែលបានបន្សល់ទុកក្នុងអំឡុងពេលមានជម្លោះលើកមុននៅស្រុកព្រំដែននៃស្រុក Kantharalak ខេត្ត Si Saket។ Kantharalak គឺជាទីតាំងនៃជម្លោះដ៏យូរទស្សវត្សន៍ជុំវិញទឹកដី ជុំវិញប្រាសាទអង្គរបុរាណនៃប្រាសាទព្រះវិហារ។
Akkaraphol បានស្លាប់ និង Warongkorn រងរបួសយ៉ាងធ្ងន់ធ្ងរ នៅពេលដែលមីនមួយបានផ្ទុះនៅម៉ោង ១០ និង៣០ នាទីព្រឹកថ្ងៃព្រហស្បតិ៍។
នាយករដ្ឋមន្រ្តីថៃ ឧត្តមសេនីយ៍ ប្រាយុទ្ធ ចាន់អូចា បានសម្តែងការរំលែកទុក្ខដល់ ក្រុមគ្រួសាររបស់ទាហានទាំងពីរ និងបានណែនាំដល់មេបញ្ជាការ ឱ្យប្រើការប្រុងប្រយ័ត្នបន្ថែម សម្រាប់បេសកកម្មដែលនៅសល់។
អាជ្ញាធរថៃ និងកម្ពុជាបានជួបប្រជុំគ្នានៅថ្ងៃទី ៨ ខែធ្នូ ហើយបានព្រមព្រៀងគ្នា ក្នុងការពន្លឿនការបោសសម្អាតមីន នៅតាមព្រំដែន ដើម្បីធានាសុវត្ថិភាពសម្រាប់អ្នកភូមិក្នុងតំបន់៕
ប្រែសម្រួលៈ ណៃ តុលា
