ព័ត៌មានអន្តរជាតិ

ក្រុមសិទ្ធិមនុស្សអាមេរិក រិះគន់ការរឹតបន្តឹងសិទ្ធិជ្រកកោនរបស់លោក បៃដិន

វ៉ាស៊ីនតោន៖ អ្នកតស៊ូមតិសិទ្ធិធ្វើចំណាកស្រុកនៅសហរដ្ឋអាមេរិកបានថ្កោលទោសការរឹតបន្តឹងព្រំដែនថ្មីរបស់រដ្ឋបាលលោក បៃដិន សម្រាប់អ្នកស្វែងរកសិទ្ធិជ្រកកោន ដោយលើកឡើងថា ការពង្រីកគោលនយោបាយបណ្ដេញចេញដ៏ចម្រូងចម្រាសធ្វើឱ្យជីវិតប្រជាជនស្ថិតក្នុងគ្រោះថ្នាក់។

ប្រធានាធិបតីអាមេរិកលោក ចូ បៃដិន បានបង្ហាញវិធានការថ្មីកាលពីថ្ងៃព្រហស្បតិ៍ រួមទាំងការបង្ខំឱ្យត្រឡប់ទៅប្រទេសម៉ិកស៊ិកជារៀងរាល់ខែនៃជនចំណាកស្រុក និងជនភៀសខ្លួនចំនួន ៣ម៉ឺននាក់ពីគុយបា នីការ៉ាហ្គា ហៃទី និងវេណេស៊ុយអេឡា ដែលចូលមកព្រំដែនភាគខាងត្បូងរបស់សហរដ្ឋអាមេរិក ក្នុងការស្វែងរកការការពារ។

ប្រភពបានឲ្យដឹងថា “ប្រសិនបើអ្នកកំពុងព្យាយាមចាកចេញពីប្រទេសគុយបា នីការ៉ាហ្គា ឬហៃទី កុំគ្រាន់តែបង្ហាញខ្លួននៅព្រំដែន។ ស្នាក់នៅកន្លែងដែលអ្នកនៅ ហើយអនុវត្តដោយស្របច្បាប់ពីទីនោះ” លោក បៃដិន បានប្រាប់អ្នកយកព័ត៌មានពីសេតវិមាន ដោយសង្កត់ធ្ងន់ថា ច្បាប់ថ្មីមានគោលបំណងកាត់បន្ថយការកើនឡើងនៃការមកដល់ព្រំដែន។

លោក Guerline Jozef នាយកប្រតិបត្តិនៃក្រុមគាំទ្រ Haitian Bridge Alliance បានឲ្យដឹងថា ដោយការជំរុញជនចំណាកស្រុក និងជនភៀសខ្លួនឱ្យស្នាក់នៅកន្លែងដែលពួកគេនៅ លោក បៃដិន បានប្រាប់ពួកគេឱ្យ “ស្នាក់នៅកន្លែងដែលពួកគេនឹងត្រូវស្លាប់” ។

លោក Jozef បានប្រាប់អ្នកយកព័ត៌មានថា “កុំមក ស្នាក់នៅកន្លែងដែលអ្នកនៅ” គឺជាវោហាសាស្ត្ររបស់រដ្ឋាភិបាលសហរដ្ឋអាមេរិក របស់រដ្ឋបាលលោក បៃដិន ដែលមិនអាចទទួលយកបាន ដែលត្រូវបានផ្តាច់ទាំងស្រុងពីការពិតនៃមនុស្សដែលភៀសខ្លួន ដើម្បីស្វែងរកសិទ្ធិជ្រកកោន៕ប្រែសម្រួល ឈូក បូរ៉ា

To Top