ប៉េកាំង ៖ អ្នកនាំពាក្យក្រសួងការបរទេសចិន បានជំរុញឱ្យសហរដ្ឋអាមេរិក និងជប៉ុន បោះបង់ការឈ្លក់វង្វេងរបស់ពួកគេ ក្នុងការទប់ស្កាត់ និងបង្ក្រាបប្រទេសចិន បញ្ឈប់ការបង្កើនការកសាងយោធា និងផ្សព្វផ្សាយភាពវឹកវរក្នុងពិភពលោក។
ការអត្ថាធិប្បាយនេះ ធ្វើឡើងបន្ទាប់ពីសេចក្តីថ្លែងការណ៍រួម នាពេលថ្មីៗនេះ ដោយមេដឹកនាំអាមេរិក និងជប៉ុន ដែលអះអាងថា តំបន់ឥណ្ឌូប៉ាស៊ីហ្វិក ប្រឈមមុខនឹងបញ្ហាកាន់តែ ច្រើនឡើង រួមទាំងពីសកម្មភាពមិនស្រប នឹងសណ្តាប់ធ្នាប់អន្តរជាតិ ដែលផ្អែកលើច្បាប់ដោយប្រទេសចិន។ ពួកគេក៏បានសង្កត់ធ្ងន់លើការប្តេជ្ញាចិត្តរបស់ពួកគេ ក្នុងការពង្រឹងសម្ព័ន្ធភាពអាមេរិក-ជប៉ុន។
អ្នកនាំពាក្យ Wang Wenbin បានប្រាប់សារព័ត៌មានប្រចាំថ្ងៃថា “សៀវភៅអាក្រក់ដែលជប៉ុន និងអាមេរិកប្រើរួមគ្នា ដើម្បីបង្ខូចមុខមាត់ចិន ជ្រៀតជ្រែកកិច្ចការផ្ទៃក្នុងរបស់ចិន និងបង្រ្កាបការអភិវឌ្ឍរបស់ចិន គឺពោរពេញទៅដោយគ្រោះថ្នាក់ និងពុតត្បុត។
លោក Wang បានចង្អុលបង្ហាញថា សកម្មភាពរបស់ប្រទេសជប៉ុន ធ្វើឱ្យប្រជាជនមានការងឿងឆ្ងល់ថា តើខ្លួនកំពុងហែកខ្លួនចេញពីការអភិវឌ្ឍន៍ ដោយសន្តិវិធីក្រោយសង្គ្រាម ហើយខ្លាចគ្រោះថ្នាក់នៃប្រវត្តិសាស្ត្រ ដែលកើតឡើងម្តងទៀតឬយ៉ាងណា។
លោក Wang បានបន្ដថា “សាររបស់យើងសម្រាប់ប្រទេសជប៉ុនគឺថា នរណាម្នាក់ដែលចង់បង្កគ្រោះថ្នាក់ និងប្រថុយប្រថានដល់សន្តិសុខ និងស្ថិរភាពនៃអាស៊ីប៉ាស៊ីហ្វិក នឹងត្រូវបានច្រានចោល និងរុញច្រានដោយបណ្តាប្រទេសនៅទូទាំងតំបន់”៕
ប្រែសម្រួល ឈូក បូរ៉ា
