ម៉ូស្គូ ៖ រុស្ស៊ីបានឲ្យដឹងថា ការបញ្ជូនរថក្រោះប្រយុទ្ធ របស់អង្គការណាតូទៅអ៊ុយក្រែន គឺជាភស្តុតាងនៃ “ដោយផ្ទាល់ និងភាពរីកចម្រើន” នៃការចូលរួមរបស់សហរដ្ឋអាមេរិក និងអឺរ៉ុប នៅក្នុងសង្គ្រាម ដោយមានអ្នកវិភាគម្នាក់ បានលើកឡើងថា ការផ្គត់ផ្គង់អាវុធពីប្រទេសនានា អាចក្លាយជាគោលដៅសក្តានុពល នាំការវាយប្រហាររបស់រុស្ស៊ី ។
ការអត្ថាធិប្បាយនេះ កើតឡើងបន្ទាប់ពីសហរដ្ឋអាមេរិក និងអាល្លឺម៉ង់ កាលពីថ្ងៃពុធបាននិយាយថា ពួកគេនឹងបំពាក់អាវុធ ដល់អ៊ុយក្រែនជាមួយនឹង រថក្រោះធុនធ្ងន់រាប់សិបគ្រឿង ក្នុងការប្រយុទ្ធប្រឆាំង នឹងកងកម្លាំងរុស្ស៊ី ។
អ្នកនាំពាក្យវិមានក្រឹមឡាំងថា “យើងមិនយល់ស្របជាដាច់ខាតចំពោះរឿងនេះ ហើយនៅទីក្រុងមូស្គូ អ្វីគ្រប់យ៉ាងដែលសម្ព័ន្ធភាព និងរដ្ឋធានីដែលខ្ញុំបានលើកឡើងកំពុងធ្វើ ត្រូវបានគេមើលឃើញថា ជាការចូលរួមដោយផ្ទាល់នៅក្នុងជម្លោះ ។ យើងឃើញថាវាកំពុងកើនឡើង”។
ទីក្រុងគៀវ បាននិងកំពុងស្វែងរករថក្រោះទំនើបៗរាប់រយគ្រឿង ដើម្បីផ្តល់ឱ្យកងទ័ពរបស់ខ្លួននូវកម្លាំងបាញ់ ដើម្បីបំបែកខ្សែការពាររបស់រុស្ស៊ី និងដណ្តើមយកមកវិញនូវទឹកដីដែលកាន់កាប់នៅភាគខាងត្បូង និងខាងកើតរបស់ប្រទេសអ៊ុយក្រែន។ អ៊ុយក្រែន និងរុស្ស៊ី បានពឹងផ្អែកជាចម្បងលើរថក្រោះ T-72 សម័យសូវៀត។
រុស្ស៊ី ដែលបានចាប់ផ្តើមសង្រ្គាម ដោយការឈ្លានពានអ៊ុយក្រែនកាលពីថ្ងៃទី២៤ ខែកុម្ភៈឆ្នាំមុន បានបង្ហាញពីជម្លោះកាន់តែខ្លាំងឡើងថា ជាការប្រឈមមុខជាមួយណាតូ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Sergey Karaganov អតីតទីប្រឹក្សាប្រធានាធិបតីរុស្ស៊ី លោក វ្ល៉ាឌីមៀ ពូទីន បានលើកឡើងថា ការប្រគល់សព្វាវុធរបស់អង្គការណាតូ អាចបណ្តាលឱ្យមានការសងសឹក ខាងយោធាប្រឆាំងនឹងប្រទេស ដែលផ្គត់ផ្គង់ពួកគេ៕
