វ៉ាស៊ីនតោន៖ អតីតឯកអគ្គរដ្ឋទូតសហរដ្ឋអាមេរិក ប្រចាំអង្គការសហប្រជាជាតិលោកស្រី Nikki Haley បានប្រកាសពីការប្រកួត ប្រជែងរបស់លោកស្រី សម្រាប់ប្រធានាធិបតីអាមេរិក ឆ្នាំ២០២៤។
លោកស្រី Haley ដែលជាអតីតអភិបាលរដ្ឋ South Carolina បានក្លាយជាសមាជិកគណបក្សសាធារណរដ្ឋដ៏លេចធ្លោ ដំបូងគេដែលប្រកួតប្រជែងជាផ្លូវការជាមួយអតីតប្រធានាធិបតីអាមេរិកលោក ដូណាល់ ត្រាំ សម្រាប់ការតែងតាំង គណបក្សក្នុងឆ្នាំ២០២៤ ។
លោកស្រី Haley អាយុ ៥១ ឆ្នាំបានឲ្យដឹងនៅក្នុងវីដេអូប្រកាសបេក្ខភាពថា “ការបង្កើតទីក្រុងវ៉ាស៊ីនតោន បានបរាជ័យម្តងហើយម្តងទៀត” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
គណបក្សសាធារណរដ្ឋផ្សេងទៀត រួមទាំងអតីតអនុប្រធានាធិបតីសហរដ្ឋអាមេរិក លោក Mike Pence និងអភិបាលរដ្ឋ Florida លោក Ron DeSantis ត្រូវបានគេរំពឹងថា នឹងចាប់ផ្តើមយុទ្ធនាការឆ្នាំ២០២៤ របស់ពួកគេនៅក្នុង ប៉ុន្មានខែខាងមុខនេះ។
ប្រធានាធិបតីសហរដ្ឋអាមេរិក លោក ចូ បៃដិន ដែលជាគណបក្សប្រជាធិបតេយ្យបានលើកឡើងថា លោកមានក៏បំណងចង់ស្វែងរកការបោះឆ្នោតជាប្រធានាធិបតីឡើងវិញដែរ៕
ប្រែសម្រួល ឈូក បូរ៉ា
