បរទេស ៖ រដ្ឋមន្ត្រីការបរទេសអ៊ីតាលីលោក Antonio Tajani កាលពីថ្ងៃព្រហស្បតិ៍ បានអំពាវនាវដល់សមភាគីចិន លោក Wang Yi ដែលកំពុងបំពេញ ទស្សនកិច្ចនៅទីក្រុងរ៉ូម ឱ្យដាក់សម្ពាធលើប្រទេសរុស្ស៊ី ឱ្យស្វែងរក “សន្តិភាព” នៅអ៊ុយក្រែន ។
យោងតាមទីភ្នាក់ងារព័ត៌មាន Macau ចេញផ្សាយ នៅថ្ងៃទី១៧ ខែកុម្ភៈ ឆ្នាំ២០២៣ បានឱ្យដឹងថា លោក Tajani បាននិយាយនៅក្នុង សេចក្តីថ្លែងការណ៍របស់ក្រសួង ការបរទេសអ៊ីតាលីបន្ទាប់ពីកិច្ចពិភាក្សា ជាមួយរដ្ឋមន្ត្រីការបរទេសចិន លោក Wang Yi ថា “ប្រទេសចិនត្រូវតែដើរតួនាទីជាមូលដ្ឋាន ដើម្បីជំរុញឆ្ពោះទៅរកសន្តិភាព” ។
លោកបានបន្ថែមថា «ខ្ញុំប្រាកដថា រដ្ឋាភិបាលទីក្រុងប៉េកាំងត្រៀមខ្លួនជាស្រេចដើម្បីធ្វើការប្ដេជ្ញាចិត្តក្នុងទិសដៅនេះ។
លោក Wang រដ្ឋមន្ត្រីការបរទេសចិន គ្រោងនឹងទៅទស្សនកិច្ចនៅប្រទេសរុស្ស៊ីនៅពេលបញ្ចប់ដំណើរទស្សនកិច្ចនៅអឺរ៉ុប។
សេចក្តីថ្លែងការណ៍បាននិយាយថា នៅក្នុងកិច្ចពិភាក្សា ជាមួយលោក Wang លោក Tajani “បានអះអាងជាថ្មី អំពីភាពចាំបាច់ក្នុងការដាក់សម្ពាធ លើប្រទេសរុស្ស៊ី ដើម្បីពង្រឹងលក្ខខណ្ឌសម្រាប់ “សន្តិភាព” តាមរយៈការគាំទ្រផ្នែកការទូត ការដាក់ទណ្ឌកម្មប្រកប ដោយប្រសិទ្ធភាព ការផ្តល់ជំនួយមនុស្សធម៌ និងរកយុត្តិធម៌ សម្រាប់ជនរងគ្រោះ ។
ចំណែកការិយាល័យរបស់លោក Macron ប្រធានាធិបតីបារាំងវិញ បានឱ្យដឹងផងដែរថា នៅពេល ដែលលោក Wang បានធ្វើទស្សនកិច្ចនៅទីក្រុងប៉ារីស កាលពីថ្ងៃពុធ លោក និងប្រធានាធិបតីបារាំង Emmanuel Macron បានយល់ព្រមក្នុងការរួមចំណែក “ឆ្ពោះទៅរកសន្តិភាព” នៅក្នុងប្រទេសអ៊ុយក្រែន។
សូមជម្រាបថា ទំនាក់ទំនងរវាងចិន និងសហភាពអឺរ៉ុប កាន់តែតានតឹងចាប់តាំងពីឆ្នាំ ២០២១ នៅពេល ដែលទីក្រុងព្រុចសែល បានដាក់ទណ្ឌកម្មលើ ទីក្រុងប៉េកាំង ដើម្បីប្រឆាំងនឹងការបង្ក្រាបរបស់ខ្លួន លើសហគមន៍មូស្លីម Uyghur ក្នុងប្រទេសចិន ។ ចិនក៏បានវាយបកលើការដាក់ទណ្ឌកម្មនេះ វិញផងដែរ៕
