ព័ត៌មានអន្តរជាតិ

អតីតប្រធានាធិបតីរុស្ស៊ី ព្រមានថា ទីក្រុងម៉ូស្គូ មានសិទ្ធិការពារខ្លួន ដោយមធ្យោបាយណាមួយ ដែលចាំបាច់ រួមទាំងការប្រើអាវុធនុយក្លេអ៊ែរ

បរទេស៖ អតីតប្រធានាធិបតីរុស្ស៊ី លោក ឌីមីទ្រី មេដវេដេវ បាននិយាយថា សហរដ្ឋអាមេរិកកំពុងព្យាយាមធ្វើឱ្យមានការបរាជ័យជាយុទ្ធសាស្ត្រលើរុស្ស៊ីក្នុងជម្លោះនៅអ៊ុយក្រែន មានន័យថា ទីក្រុងម៉ូស្គូមានសិទ្ធិការពារខ្លួនដោយមធ្យោបាយណាមួយដែលចាំបាច់ រួមទាំងការប្រើអាវុធនុយក្លេអ៊ែរផងដែរ។ លោក​បាន​ព្រមាន​ថា ឥស្សរជន​អាមេរិក​មិន​គួរ​ចាត់​ទុក​ខ្លួន​ឯង​ជា​មនុស្ស​មិន​អាច​ប៉ះ​ពាល់​បាន​ឡើយ។

យោងតាមសារព័ត៌មាន RT ចេញផ្សាយនៅថ្ងៃទី២២ ខែកុម្ភៈ ឆ្នាំ២០២៣ បានឱ្យដឹងថា លោក មេវេដេវ ដែលមានតួនាទីជាអនុប្រធានក្រុមប្រឹក្សាសន្តិសុខរុស្ស៊ី បានធ្វើអត្ថាធិប្បាយកាលពីថ្ងៃពុធ បន្ទាប់ពីសុន្ទរកថាដែលបានធ្វើឡើងកាលពីថ្ងៃមុនដោយមេដឹកនាំរុស្ស៊ី និងសហរដ្ឋអាមេរិក។

ថ្លែងទៅកាន់សភាសហព័ន្ធ ក៏ដូចជាមន្ត្រីរុស្ស៊ី និងឥស្សរជនផ្សេងទៀត ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសកាលពីថ្ងៃអង្គារថា ទីក្រុងម៉ូស្គូផ្អាកការចូលរួមរបស់ខ្លួននៅក្នុងសន្ធិសញ្ញា New START ដែលជាកិច្ចព្រមព្រៀងកាត់បន្ថយអាវុធនុយក្លេអ៊ែរចុងក្រោយដែលនៅសេសសល់រវាងសហរដ្ឋអាមេរិក និងរុស្ស៊ី។

ចំណែកលោក មេវេដេវ អតីតប្រធានាធិបតីវិញបានអះអាងថា លោកបានទន្ទឹងរង់ចាំយូរមកហើយ អំពីចំណាត់ការនេះ ហើយបានអះអាងថា វាគួរតែជាសារមួយ ដល់សហរដ្ឋអាមេរិក ដែលគិតថា វាអាច “ដេញតាមការបរាជ័យរបស់រុស្ស៊ី… ប៉ុន្តែសន្តិសុខជាយុទ្ធសាស្ត្រ គឺជាបញ្ហាមួយផ្សេងទៀត”។ អតីតមេដឹកនាំរូបនេះបានហៅការវែកញែកនេះថាជា “កំហុសដ៏អាក្រក់របស់អាមេរិក” ហើយបានព្រមានថា “ចាប់តាំងពីសហរដ្ឋអាមេរិកចង់កម្ចាត់រុស្ស៊ី យើងមានសិទ្ធិការពារខ្លួនដោយអាវុធណាមួយរួមទាំងនុយក្លេអ៊ែរផងដែរ” ៕

ប្រែសម្រួលៈ ណៃ តុលា

To Top