ព្រុចសែល៖ ទណ្ឌកម្មដែលដាក់លើប្រទេសស៊ីរីត្រូវបានសហភាពអឺរ៉ុបបន្ធូរបន្ថយជាបណ្ដោះអាសន្ន ដើម្បីពន្លឿនការផ្ដល់ជំនួយដល់ប្រទេសពីរសប្ដាហ៍ បន្ទាប់ពីរញ្ជួយដីដ៏ធ្ងន់ធ្ងរ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National។
ក្រុមប្រឹក្សាអឺរ៉ុបបានឲ្យដឹងថា រដ្ឋជាសមាជិកសហភាពអឺរ៉ុប នឹងលែងត្រូវការផ្តល់ការអនុញ្ញាត ឱ្យផ្តល់ជំនួយដល់អង្គការនានា មុនពេលបញ្ជូនការផ្គត់ផ្គង់ និងសេវាកម្មទៅអង្គភាពដែលមានទណ្ឌកម្មនៅក្នុងប្រទេសស៊ីរី។
ការសម្រេចចិត្តនេះ ត្រូវបានធ្វើឡើងដោយមើលឃើញ ពីភាពធ្ងន់ធ្ងរនៃវិបត្តិមនុស្សធម៌នៅស៊ីរី ដែលមានការរញ្ជួយដីកាន់តែខ្លាំង ហើយការផ្អាកទណ្ឌកម្មនេះ នឹងមានរយៈពេល ៦ខែ។
គួរបញ្ចាក់ថា គ្រោះថ្នាក់រញ្ជួយដីកម្រិត ៧,៨រ៉ិចទ័រ កាលពីថ្ងៃទី០៦ ខែកុម្ភៈ បានសម្លាប់មនុស្សជាង ៤២០០០ នាក់នៅក្នុងប្រទេសតួកគី និងច្រើនជាង ៣៦០០ នាក់នៅក្នុងប្រទេសស៊ីរី។
សហភាពអឺរ៉ុបបានឲ្យដឹងថា ខ្លួន និងរដ្ឋជាសមាជិករបស់ខ្លួនកំពុងនាំមុខអ្នកផ្តល់ជំនួយមនុស្សធម៌ដល់ប្រទេសស៊ីរី ដែលហែកហួរដោយជម្លោះ ដោយបានបរិច្ចាគប្រាក់ចំនួន ២៧,៤ពាន់លានអឺរ៉ូ (២៦ ពាន់លានដុល្លារ) ដល់ប្រទេស និងដល់ប្រទេសជិតខាងដែលធ្វើជាម្ចាស់ផ្ទះទទួលជនភៀសខ្លួន ដូចជាទួរគី ចាប់តាំងពីឆ្នាំ២០១១ មក៕
ប្រែសម្រួល ឈូក បូរ៉ា
