ព័ត៌មានអន្តរជាតិ

ឧត្តមសេនីយ៍កំពូលអីរ៉ង់ថា អីរ៉ង់នៅតែចង់សម្លាប់ អតីតប្រធានាធិបតីអាមេរិក Donald Trump

បរទេស ៖ ក្រុងតេអេរ៉ង់ នៅតែកំពុងស្វែងរកការធ្វើឃាត អតីតប្រធានាធិបតីអាមេរិកលោក Donald Trump, អតីតរដ្ឋមន្រ្តីការបរទេសលោក Mike Pompeo និងមន្ត្រីផ្សេងទៀត ដែលទទួលខុសត្រូវ ចំពោះការធ្វើឃាតឧត្តមសេនីយ៍ Qassem Soleimani កាលពីឆ្នាំ ២០២០, នេះបើតាម លោក Amirali Hajizadeh ប្រធានកងកម្លាំងឆ្មាំបដិវត្តន៍ (IRGC) កងកម្លាំងអាកាស បាននិយាយកាលពីថ្ងៃសុក្រ។

យោងតាមសារព័ត៌មាន RT ចេញផ្សាយនៅថ្ងៃទី២៥ ខែកុម្ភៈ ឆ្នាំ២០២៣ បានឱ្យដឹងថា ឧត្តម​សេនីយ៍​កំពូល​អីរ៉ង់រូបនេះ បាន​ធ្វើ​ការ​កត់​សម្គាល់បែបនេះ ខណៈ​ដែល​លោក​បាន​ដាក់​បង្ហាញ ​មីស៊ីលនាំផ្លូវថ្មី​ដែល​ហោះបានរយៈ​ចម្ងាយ ១ ៦៥០គីឡូម៉ែត្រ ។

លោក Hajizadeh បាននិយាយថា “យើងសង្ឃឹមថាយើងអាចសម្លាប់ Trump, Pompeo, [ឧត្តមសេនីយ៍ចូលនិវត្តន៍របស់សហរដ្ឋអាមេរិក Kenneth] McKenzie និងមេបញ្ជាការយោធា ដែលបានបញ្ជាផ្សេងទៀត” ។

ឧត្តមសេនីយកំពូលរបស់អ៊ីរ៉ង់ លោក Qassem Soleimani ត្រូវបានសម្លាប់នៅក្នុងការវាយប្រហារ ដោយយន្តហោះគ្មានមនុស្ស បើករបស់សហរដ្ឋអាមេរិក កាលពីថ្ងៃទី ៣ ខែមករា ឆ្នាំ ២០២០ ខណៈកំពុងបំពេញទស្សនកិច្ច នៅរដ្ឋធានីបាកដាដ របស់ប្រទេសអ៊ីរ៉ាក់។ បន្ទាប់មកប្រធានាធិបតី Trump បានអួតម្តងហើយម្តងទៀត អំពីការចាត់ចែងការវាយប្រហារ ដោយផ្ទាល់ ដោយទទូចថា វាជាការសងសឹក ចំពោះការវាយប្រហារ ដែលបានអះអាងទៅលើបុគ្គលិក អាមេរិកនៅទូទាំងតំបន់ ដែលធ្វើឡើងដោយអ៊ីរ៉ង់។

មន្ត្រីកំពូលនៅទីក្រុងតេអេរ៉ង់ បានសច្ចារម្តងហើយម្តងទៀតថា នឹងសងសឹកចំពោះការធ្វើឃាតលោកឧត្តមសេនីយ៍ Soleimani ដោយគំរាមសម្លាប់លោក Trump និងអ្នកផ្សេងទៀត នៅពីក្រោយការវាយប្រហារនោះ ។ ទន្ទឹមនឹងនេះ អ៊ីរ៉ង់បាននិងកំពុងបន្តស្វែងរកផ្លូវច្បាប់បន្ថែមទៀត ដើម្បីដាក់ទោសពិរុទ្ធជន ដោយបានស្នើសុំម្តង ហើយម្តងទៀត ឱ្យប៉ូលិស Interpol ជួយចាប់លោក Trump និងមន្ត្រីអាមេរិកជិត ៥០នាក់ផ្សេងទៀត ដែលខ្លួនជឿថា មានជាប់ពាក់ព័ន្ធទៅនឹង ការវាយប្រហារនេះ៕

To Top