បរទេស៖ ក្រុមប៉ូលីស នៅក្នុងរដ្ឋធានីអ៊ីស្លាមម៉ាបាដ បានរៀបចំឯកសារ ដើម្បីដាក់ពាក្យប្តឹង អតីតប្រធានាធិបតីប៉ាគីស្ថាន លោក Imran Khan ក្រោយពេលដែលក្រុមអ្នកគាំទ្រ របស់លោកបាននាំគ្នា សម្រុកចូលទីតាំង អគារតុលាការកំពូល កាលពីប៉ុន្មានថ្ងៃ កន្លងមកនេះ។
យោងតាមការចេញផ្សាយរបស់ RT កាលពីថ្ងៃម្សិលមិញនេះបានឲ្យដឹងថាលោក Khan រួមជាមួយនឹងមន្ត្រីជាច្រើននាក់នៅក្នុងគណបក្ស Pakistan Tehreek-e-Insaf (PTI) របស់គាត់ និងអ្នកគាំទ្ររបស់គាត់ជាច្រើនរយនាក់ ទៀតត្រូវបានចោទប្រកាន់ពីបទល្មើសមួយចំនួន រួមមានកុបកម្ម ការរារាំង ការវាយប្រហារលើមន្រ្តីប៉ូលីស ការដុតបំផ្លាញ ការគំរាមកំហែង និងជាពិសេស អំពើភេរវកម្មផងដែរ។
គួរឲ្យដឹងដែរថាការចោទប្រកាន់ថ្មីនេះកើតចេញពីកុបកម្មនៅខាងក្រៅបរិវេណតុលាការក្រុងអ៊ីស្លាម៉ាបាដកាលពីថ្ងៃសៅរ៍ ដែលក្នុងនោះក្រុមអ្នកតវ៉ាបានគប់ដុំថ្ម និងគ្រាប់បែកភ្លើងដាក់ប៉ូលិស ខណៈដែលពួកគេកំពុងរង់ចាំវត្តមានមកដល់របស់លោក Khan។
ហេតុការណ៍នេះបានបង្កឲ្យកើតមានជម្លោះដាក់គ្នារវាងក្រុមបាតុករនិងក្រុមអជ្ញាធរដោយក្នុងនោះរថយន្តប៉ូលិសរាប់សិបគ្រឿងត្រូវបានឆេះ ហើយមន្ត្រីបានឆ្លើយតបដោយឧស្ម័នបង្ហូរទឹកភ្នែកទៀតផង៕
ប្រែសម្រួល៖ស៊ុនលី
