ព័ត៌មានអន្តរជាតិ

សេដ្ឋកិច្ចម៉ិកស៊ិក នៅតែអាចដំណើរការបានល្អ បើទោះជាមានវិបត្ដិធនាគារអាមេរិក

អូតាវ៉ា៖ ប្រធានាធិបតីម៉ិកស៊ិក លោក Andres Manuel Lopez Obrador បានឲ្យដឹងថា សេដ្ឋកិច្ចរបស់ប្រទេសម៉ិកស៊ិកគឺ “រឹងមាំ” ហើយអាចទប់ទល់នឹង ការប៉ះទង្គិចខាងក្រៅ ដូចជាវិបត្តិដែលបង្ករឡើង ដោយធនាគារជាច្រើន នៅក្នុងសហរដ្ឋអាមេរិក។

លោក Lopez Obrador បានឲ្យដឹងនៅក្នុងសន្និសីទសារព័ត៌មានប្រចាំថ្ងៃរបស់លោកថា ជាមួយនឹងធនាគារម៉ិកស៊ិកចុះបញ្ជីប្រាក់ចំណេញកំណត់ត្រា “ភាគច្រើននៃប្រជាជនម៉ិកស៊ិក កំពុងដំណើរការបានល្អ” ។

លោក​បាន​បន្ត​ថា “មាន​ស្ថិរភាព​ម៉ាក្រូ​សេដ្ឋកិច្ច ​ក្នុង​ប្រទេស ហើយ​គ្មាន​វិបត្តិ​អ្វី​កើតឡើង​នោះទេ​” នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។

លោក Lopez Obrador បានបន្ដថា វាអាចមានព្រឹត្តិការណ៍ ដែលមិនបានមើលឃើញទុកជាមុន និងកត្តាខាងក្រៅ ដូចជាភាពចលាចលផ្នែកហិរញ្ញវត្ថុ ដែលបណ្តាលមកពីការដួលរលំ នៃស្ថាប័នធនាគារពីរនៅបរទេសក្នុងខែនេះ ដោយពណ៌នាអំពីសេដ្ឋកិច្ចរបស់ប្រទេសម៉ិកស៊ិកថា “រឹងមាំ”។

គួរបញ្ជាក់ថា សេដ្ឋកិច្ចរបស់ប្រទេសម៉ិកស៊ិក ដែលជាប្រទេសធំទីពីរនៅអាមេរិកឡាទីន បន្ទាប់ពីប្រេស៊ីល បានកើនឡើង ៣,១ភាគរយក្នុងឆ្នាំ២០២២៕

ប្រែសម្រួល ឈូក បូរ៉ា

To Top