ប៉េកាំង៖ នាយករដ្ឋមន្ត្រីចិនលោក លី ឈាំង បានសម្តែងការប្រឆាំងកាលពីថ្ងៃព្រហស្បតិ៍ ចំពោះការប្រឈមមុខដាក់គ្នាក្នុងប្លុក និង “សង្រ្គាមត្រជាក់” ថ្មីមួយនៅក្នុងការព្រមានបិទបាំង ចំពោះសហរដ្ឋអាមេរិក ដែលបានចូលរួមក្នុងការប្រកួតប្រជែង កាន់តែខ្លាំងជាមួយប្រទេសចិន។
នៅក្នុងសុន្ទរកថាសំខាន់នៅឯវេទិកា Boao សម្រាប់អាស៊ី លោក លី បានរក្សាជំហរថា ប្រទេសចិន នឹង “តែងតែជាអ្នកកសាងសន្តិភាពពិភពលោក ជាអ្នករួមចំណែកដល់ការអភិវឌ្ឍន៍ពិភពលោក និងជាអ្នកការពារសណ្តាប់ធ្នាប់អន្តរជាតិ” ចំពេលមានការភ័យខ្លាចកាន់តែខ្លាំងឡើង ជុំវិញការបង្កើនអាវុធរបស់ខ្លួន និងសម្ពាធយោធាលើកោះតៃវ៉ាន់ ដែលទីក្រុងប៉េកាំងចាត់ទុកថាជារបស់ខ្លួន។
ការកត់សម្គាល់របស់លោក នៅក្នុងព្រឹត្តិការណ៍នៅលើកោះហៃណាន ភាគខាងត្បូងប្រទេសចិន ដែលត្រូវបានចាត់ទុកថាជាជម្រើសរបស់អាស៊ី ចំពោះវេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស បានកើតមានឡើងនៅពេលដែលសហរដ្ឋអាមេរិក បានរៀបចំកិច្ចប្រជុំកំពូលនិម្មិត ស្តីពីលទ្ធិប្រជាធិបតេយ្យចំពេលមានការប្រកួតប្រជែងកាន់តែស៊ីជម្រៅរវាងទីក្រុងវ៉ាស៊ីនតោន និងអ្វីដែលវាពិពណ៌នាថាជាស្វ័យភាពដូចជា ចិន និងរុស្ស៊ី។
នាយករដ្ឋមន្ត្រីចិនរូបនេះ ក៏បានលើកឡើងផងដែរថា ប្រទេសចិន ប្រឆាំងនឹង “លទ្ធិគាំពារនិយមពាណិជ្ជកម្ម និងការកាត់ផ្តាច់” ដោយអំពាវនាវឱ្យមានកិច្ចខិតខំប្រឹងប្រែង ដើម្បីធានាស្ថិរភាពនៃខ្សែសង្វាក់ ផ្គត់ផ្គង់ឧស្សាហកម្មសកល ខណៈដែលទីក្រុងវ៉ាស៊ីនតោន ព្យាយាមរឹតបន្តឹងលើការចូលប្រើប្រាស់ បច្ចេកវិទ្យាទំនើបរបស់ប្រទេសអាស៊ីដូចជា semiconductors ជាដើម។
ចំពេលមានភាពមិនច្បាស់លាស់ លើសេដ្ឋកិច្ចពិភពលោកដោយសារតែ ការលុកលុយរបស់រុស្ស៊ីលើអ៊ុយក្រែន និងការកើនឡើងហានិភ័យហិរញ្ញវត្ថុ បន្ទាប់ពីការបរាជ័យធនាគាររបស់ សហរដ្ឋអាមេរិកនាពេលថ្មីៗនេះ លោក លី បានបង្ហាញទំនុកចិត្តលើទស្សនវិស័យ សម្រាប់សេដ្ឋកិច្ចធំទីពីររបស់ពិភពលោក ដោយលើកឡើងពីសន្ទុះខ្លាំង សម្រាប់កំណើនរបស់ខ្លួន។
លោក លី បានបន្ដថា “វិនិច្ឆ័យពីស្ថានភាពក្នុងខែមីនា វាល្អប្រសើរជាងក្នុងខែមករា និងខែកុម្ភៈ ជាពិសេស សូចនាករសេដ្ឋកិច្ចសំខាន់ៗ ដូចជាការប្រើប្រាស់ និងការវិនិយោគបន្តមានភាពប្រសើរឡើង ខណៈដែលការងារ និងតម្លៃជាទូទៅមានស្ថិរភាព” ៕
ប្រែសម្រួល ឈូក បូរ៉ា
