បរទេស៖ អតីតប្រធានាធិបតីអាមេរិក លោក Donald Trump មិនបានសារភាពទោសកំហុស លើបទចោទប្រកាន់ឧក្រិដ្ឋកម្មទាំង ៣៤ ប្រឆាំងនឹងរូបលោក បន្ទាប់ពីបានប្រគល់ខ្លួននៅក្នុងសំណុំរឿង នៅទីក្រុងញូវយ៉ក ដែលផ្តើមចេញពីការចោទប្រកាន់ របស់គាត់កាលពីឆ្នាំ ២០១៦ ចំពោះការបង់ប្រាក់បំបិទមាត់ទៅឱ្យតារាសិចគឺនាង Stormy Daniels ។
យោងតាមសារព័ត៌មាន RT ចេញផ្សាយនៅថ្ងៃទី៤ ខែមេសា ឆ្នាំ២០២៣ បានឱ្យដឹងថា លោក Trump អាយុ ៧៦ ឆ្នាំ បានចូលខ្លួនឆ្លើយបំភ្លឺនៅតុលាការ កាលពីថ្ងៃអង្គារនៅក្នុងបន្ទប់សវនាការនៅសង្កាត់ Manhattan ដោយក្លាយជាប្រធានាធិបតីដំបូងគេ ក្នុងប្រវត្តិសាស្ត្រអាមេរិក ដែលប្រឈមមុខនឹងការកាត់ទោសព្រហ្មទណ្ឌ។ មេធាវីរបស់គាត់បានថ្កោលទោសការចោទប្រកាន់នេះថា ជា “ការធ្វើទុក្ខបុកម្នេញ” ដែលដឹកនាំដោយនយោបាយដែលប្រព្រឹត្តដោយមេធាវីស្រុក Alvin Bragg ដែលជាអ្នកប្រជាធិបតេយ្យដែលបានឈរឈ្មោះសម្រាប់តំណែងដោយសន្យាថា នឹងកាត់ទោសអតីតប្រធានាធិបតី ហើយយុទ្ធនាការរបស់គាត់ត្រូវបានផ្តល់មូលនិធិយ៉ាងច្រើន ដោយសកម្មជនមហាសេដ្ឋី George Soros ។
លោក Trump ត្រូវបានគេរាយការណ៍ថា បានអង្គុយដោយដៃរបស់គាត់ដែលដាក់នៅខាងមុខ ខណៈដែលគាត់បាននិយាយថា “មិនមានកំហុស” នៅពេលត្រូវបានសួរពីរបៀបដែលគាត់ប្តឹងចំពោះការចោទប្រកាន់។
មុនពេលសវនាការ គាត់បានលើកដៃទៅកាន់ហ្វូងមនុស្ស ដែលបានប្រមូលផ្តុំគ្នា នៅខាងក្រៅតុលាការ បន្ទាប់ពីត្រូវបានធ្វើដំណើរពីផ្ទះរបស់គាត់នៅឯអគារ Trump Tower ក្នុងទីក្រុង Manhattan ។ លោកមិនអើពើនឹងសំណួររបស់អ្នកយកព័ត៌មានទេ ពេលលោកចេញពីបន្ទប់សវនាការ៕ ប្រែសម្រួលៈ ណៃ តុលា
