បរទេស៖អ្នកនាំពាក្យរបស់ក្រសួងការបរទេសចិនលោកស្រីMao Ning កាលពីថ្ងៃម្សិលមិញនេះបានថ្លែងថាណាតូ គឺជាអ្នកត្រូវទទួលខុសត្រូវចំពោះមុខបញ្ហាជម្លោះ និងវិបត្តិនៅអ៊ុយក្រែនហើយមិនមែនជារដ្ឋាភិបាលក្រុងប៉េកាំងនោះទេ។
យោងតាមការចេញផ្សាយរបស់RT ថ្លែងទៅកាន់សន្និសិទកាសែតប្រចាំថ្ងៃលោកស្រី Mao Ning បានបន្តទៀតថា ហើយណាតូគឺជា ភាគីដែលមិនមានសិលធម៍ទាល់តែសោះ ដែលចេញមុខមករិះគន់ប្រទេសចិន ជុំវិញបញ្ហានៅអ៊ុយក្រែន ទៅវិញនោះ។
លោកស្រីបន្តថា៖ ទាំងសហរដ្ឋអាមេរិក និងប្លុកយោធាដែលដឹកនាំដោយណាតូគួរតែជា អ្នកដែលត្រូវទទួលខុស ត្រូវចំពោះមុខវិបតិ្តនៅអ៊ុយក្រែនហើយណាតូគ្មាន តួនាទីអ្វីដែលត្រូវមករិះគន់រដ្ឋាភិបាលប៉េកាំងនោះឡើយ។
លោកស្រីបញ្ជាក់ដែរថា៖ចំពោះវិបត្តិអ៊ុយក្រែន ចិនប្រកាន់ជំហរយ៉ាងត្រឹមត្រូវ និងមានគោលដៅច្បាស់លាស់ហើយ យើងបាននិងកំពុងតស៊ូមតិក្នុងការដោះស្រាយវិបត្តិនយោបាយ និងធ្វើការចរចាដើម្បីសន្តិភាព តាមរយៈការប្រើប្រាស់យុទ្ធសាស្ត្រមួយដែលគាំទ្រដោយប្រទេសភាគច្រើនក្នុងពិភពលោក៕
ប្រែសម្រួល៖ស៊ុនលី
