អង់ការ៉ា៖ ប្រធានាធិបតីតួកគីលោក Recep Tayyip Erdogan និងសមភាគីអ៊ីរ៉ង់ លោក Ebrahim Raisi បានពិភាក្សាគ្នា នៅក្នុងការសន្ទនា តាមទូរស័ព្ទអំពីការកើនឡើង នៃភាពតានតឹងបន្ទាប់ពីការវាយឆ្មក់ របស់អ៊ីស្រាអែល ទៅលើបរិវេណវិហារអ៊ីស្លាម Al-Aqsa ក្នុងទីក្រុងយេរ៉ូសាឡឹមខាងកើត កាលពីដើមសប្តាហ៍នេះ។
ក្នុងអំឡុងពេលសន្ទនា លោក Erdogan បានគូសបញ្ជាក់អំពីសារៈសំខាន់ នៃការបង្រួបបង្រួមពិភពអ៊ីស្លាម ប្រឆាំងនឹងការវាយប្រហាររបស់អ៊ីស្រាអែល នៅប៉ាឡេស្ទីន ជាពិសេសនៅក្នុងបរិវេណវិហារអ៊ីស្លាម Al-Aqsa នេះបើយោងតាមសេចក្តីថ្លែងការណ៍។
ដើម្បីទប់ស្កាត់ការរីករាលដាល នៃអំពើហឹង្សាថ្មី លោក Erdogan បានលើកឡើងថា វានឹងមានប្រយោជន៍ ក្នុងការចាប់ផ្តើមគំនិតផ្តួចផ្តើម ដើម្បីដឹកនាំភាគីទាំងអស់ ទៅរកសុភវិនិច្ឆ័យ នេះបើយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។
លោកបានអំពាវនាវឲ្យមានកិច្ចខិតខំប្រឹងប្រែងរួមគ្នាដើម្បីរក្សាឋានៈនៃទីសក្ការៈលើវេទិកាអន្តរជាតិ ជាពិសេសអង្គការសហប្រតិបត្តិការអ៊ីស្លាម (OIC) និងអង្គការសហប្រជាជាតិ។
លោក Erdogan បានប្រាប់ប្រធានាធិបតីអ៊ីរ៉ង់ថា វាមានសារៈសំខាន់ផងដែរ សម្រាប់ពួកគេក្នុងការ បង្ហាញការរួបរួមនៅ ចំពោះមុខការដុតព្រះគម្ពីគូរ៉ា នៅក្នុងទីក្រុងមួយចំនួននៅអឺរ៉ុបនាពេលថ្មីៗនេះ ជាពិសេសនៅមុខស្ថានទូតតួកគី ។
សម្រាប់ផ្នែករបស់លោកវិញ លោក Raisi បានថ្កោលទោស “ឧក្រិដ្ឋកម្ម” ដែលប្រព្រឹត្តដោយ អ៊ីស្រាអែល ប្រឆាំងនឹងប៉ាឡេស្ទីន ជាពិសេសការវាយប្រហារ លើអ្នកគោរពបូជានៅបរិវេណវិហារអ៊ីស្លាម Al-Aqsa និងការប្រមាថ នៃកន្លែងបរិសុទ្ធ។ លោកបានអំពាវនាវឲ្យមានកិច្ចប្រជុំ OIC ជាបន្ទាន់ ដើម្បីពិភាក្សាអំពីវិធានការ ដើម្បីដោះស្រាយជាមួយនឹងអរិភាព របស់អ៊ីស្រាអែល ៕
ប្រែសម្រួល ឈូក បូរ៉ា
