ព័ត៌មានអន្តរជាតិ

ប្រទេសបារាំង នឹងឃើញការធ្វើបាតុកម្ម ធំបំផុតក្នុងខែឧសភានេះ ដែលមិនធ្លាប់កើតមាន ក្នុងរយៈពេល ៣០-៤០ ឆ្នាំនេះ

បរទេស៖ លោក Laurent Berger អគ្គលេខាធិការនៃសហភាព ការងារប្រជាធិបតេយ្យបារាំង (CFDT) បាននិយាយកាលពីថ្ងៃអាទិត្យថា បាតុកម្មនៅថ្ងៃទី ១ ខែឧសភា នឹងក្លាយជាបាតុកម្មដ៏ធំបំផុត នៅក្នុងប្រទេសបារាំងក្នុងរយៈពេល ៣០-៤០ ឆ្នាំ មកនេះ ដោយមនុស្សនៅតែបន្តតវ៉ា ប្រឆាំងនឹងកំណែទម្រង់ប្រាក់សោធននិវត្តន៍ ដ៏ចម្រូងចម្រាសរបស់ប្រធានាធិបតីលោក ម៉ាក្រុង។

យោងតាមសារព័ត៌មាន Sputnik ចេញផ្សាយនៅថ្ងៃទី១ ខែឧសភា ឆ្នាំ២០២៣ បានឱ្យដឹងថា កាលពីដើមខែនេះ សហជីពឈានមុខគេរបស់ ប្រទេសបារាំងបានអំពាវនាវឱ្យ មានកូដកម្មទូទាំងប្រទេសប្រឆាំងនឹង កំណែទម្រង់នៅថ្ងៃទី ១ ខែឧសភា។ លោក Berger បានប្រាប់ទូរទស្សន៍ LCI ថា “វានឹងក្លាយជាថ្ងៃទី១ ខែឧសភាដ៏ធំបំផុតទាក់ទងនឹង បញ្ហាសង្គមក្នុងរយៈពេល ៣០-៤០ ឆ្នាំ” ។

យោងតាម CFDT ប្រជាជនចំនួន ១,៥ លាននាក់អាចធ្វើដំណើរតាមផ្លូវ ទូទាំងប្រទេសបារាំងនៅថ្ងៃទី១ ខែឧសភា ដើម្បីតវ៉ាប្រឆាំងនឹងកំណែទម្រង់ ប្រាក់សោធននិវត្តន៍របស់រដ្ឋាភិបាល។ ជាមួយគ្នានេះ ក្រសួងមហាផ្ទៃបារាំងរំពឹងថា មនុស្សរហូតដល់ ៦៥ម៉ឺននាក់ នឹងចូលរួមក្នុងបាតុកម្មនៅខែឧសភា។ ប្រព័ន្ធផ្សព្វផ្សាយបារាំងបានរាយការណ៍ថា មនុស្សប្រហែលពី ១០០ ០០០នាក់ ទៅ ១៦០ ០០០នាក់ ជាធម្មតាចូលរួមក្នុងការប្រមូលផ្តុំ នៅក្នុងប្រទេសបារាំងនៅថ្ងៃនោះ។

រដ្ឋមន្ត្រីក្រសួងមហាផ្ទៃបារាំង លោក Gerald Darmanin បាននិយាយនៅមុននេះថា មន្ត្រីអនុវត្តច្បាប់ប្រហែល ១២ ០០០ នាក់ នឹងត្រូវដាក់ពង្រាយ នៅទូទាំងប្រទេសបារាំង ដោយមានមន្ត្រីចំនួន ៥ ០០០ នាក់នៅក្នុងរដ្ឋធានីបារាំងតែម្នាក់ឯង ៕

ប្រែសម្រួលៈ ណៃ តុលា

To Top