បរទេស ៖ មន្ត្រី និងប្រព័ន្ធផ្សព្វផ្សាយអ៊ុយក្រែន បានរាយការណ៍ពីការវាយប្រហារ ជាបន្តបន្ទាប់របស់យន្តហោះ គ្មានមនុស្សបើក និងមីស៊ីលរបស់រុស្ស៊ី កាលពីព្រឹកព្រលឹមថ្ងៃច័ន្ទ ដោយបានបង្ក ឱ្យមានសំឡេងស៊ីរ៉ែនរោទ៍ឡើង ពេលមានការវាយប្រហារ តាមអាកាសពេញប្រទេស។
យោងតាមសារព័ត៌មាន RT ចេញផ្សាយកាលពីថ្ងៃទី៨ ខែឧសភា ឆ្នាំ២០២៣ បានឱ្យដឹងថា យោធាអ៊ុយក្រែនបានអះអាងថា បានបាញ់ទម្លាក់យន្តហោះគ្មានមនុស្សបើក kamikaze ចំនួន ៣៥ គ្រឿងលើក្រុងគៀវតែម្នាក់ឯង ។ អាជ្ញាធរក្នុងរដ្ឋធានីបាននិយាយថា កំទេចកំទីដែលធ្លាក់មកពីលើអាកាស បានបណ្តាលឱ្យមនុស្ស៥នាក់រងរបួស និងខូចខាតផ្ទះល្វែងមួយរួមជា មួយរថយន្តប្រមាណ២០គ្រឿង។ លើសពីនេះ ធុងប្រេងម៉ាស៊ូតមួយបានធ្លាយ ប៉ុន្តែ មិនបណ្តាលឱ្យមានអគ្គីភ័យនោះទេ ។
ដោយដកស្រង់ប្រភពយោធា ប្រព័ន្ធផ្សព្វផ្សាយអ៊ុយក្រែន បានរាយការណ៍ថា នៅម៉ោងប្រហែលពាក់កណ្តាលអធ្រាត្រម៉ោងក្នុងស្រុក យន្តហោះទម្លាក់គ្រាប់បែក របស់កងទ័ព អាកាសរុស្ស៊ី បានបាញ់មីស៊ីលចំនួន ៨ គ្រាប់ ដោយយ៉ាងហោចណាស់មួយគ្រាប់ បានវាយប្រហារឃ្លាំងមួយក្នុងតំបន់ Odessa ។
ប្រព័ន្ធផ្សព្វផ្សាយអ៊ុយក្រែន ក៏បានរាយការណ៍ពីការផ្ទុះនៅក្នុងតំបន់ Chernigov និង Dnepropetrovsk ក៏ដូចជាទីក្រុង Zaporozhye ផងដែរ៕
